ننګرهار پوهنتون کې د ۸ کادري بستونو لپاره له ۵۷ تنو کاندیدانو ازموینه واخیستل شوه.

یاده ازموینه د لوړو زده کړو وزارت او ننګرهار پوهنتون د ګډ هیئت له خوا د ننګرهار، کونړ سید جمال الدین افغاني او باميان پوهنتونونو د ژبو او ادبیاتو، کرنې، ساینس، اقتصاد او کمپیوټر ساینس پوهنځیو د بېلابېلو څانګو لپاره واخیستل شوه. 
د علمي کادر بستونو یاده ازموینه د لوړو زده کړو وزارت پلاوي او د ننګرهار پوهنتون د مشرتابه په حضور کې د ټاکل شوي ممتحنه هیئت له خوا واخیستل شوه.
د ننګرهار پوهنتون رئیس شیخ انعام الله مدني، د علمي چارو مرستیال پوهندوی مولوي احسان الله ناصح او د  اداري او مالي چارو مرستیال پوهنیار قاضي خالد صداقت  د لوړو زده کړو وزارت د تقرر او علمي ترفیعاتو ریاست څخه  د خصوصي تقرر آمر دوکتور  نور احمد بلال په مشرۍ راغلي پلاوي په ملتیا د ازموینې اخیستلو بهیر نه لیدنه او څارنه وکړه.
نوموړو په خپلو خبرو کې ګډونوالو کاندیدانو ته ډاډ ورکړ، چې د ازموينې د روڼتیا او شفافیت په برخه کې یې تر ممکنه حده هلې ځلې کړي او د عدالت له مخې به حق حقدار ته وسپاري.
سرچینه: د اطلاعاتو، نشراتو او عامه اړیکو آمریت