د ننګرهار پوهنتون طب پوهنځي کتابتون ته د سولري برېښنا جوړېدو سربېره ددې پوهنځي د مختلفو برخو رغاونه وشوه.

د ابادۍ یادې چارې د ننګرهار پوهنتون د اداري او مالي چارو مرستیال په لارښوونه او طب پوهنځي مسؤلینو په همکارۍ د پوهنتون له داخلي منابعو، (GAAC) موسسې او افغان بیسیم مخابراتي شرکت په مالي مرسته ترسره شوې.

د پوهنځي کتابتون ته د ۲۲ کیلو واټه سولري برېښنا جوړېدو چارې د (GAAC) موسسې له خوا او د یاد پوهنځي د ۲۵۰ مترو په اندازه د احاطې دېوالونو رنګ، لوحو، بنرونو چاپ او د محصلینو د ناستې لپاره د ۸ پنځه کسیزه چوکیو مرسته د افغان بیسیم مخابراتي شرکت له لوري ترسره شوه.

همدارنګه د طب پوهنځي د مسؤلینو په هلو ځلو او د یاد پوهنځي د فارغو ډاکتر صاحبانو په مرسته نوي دفتري مېزونه جوړ شول.

د ننګرهار پوهنتون د اداري او مالي چارو مرستیال پوهنیار قاضي خالد صداقت یاده برخه کې د ټولو مسؤلینو، فارغانو او مرستندویه ادارو له همکاریو مننه وکړه او یاد فعالیتونه یې د طب پوهنځي په پرمختګ کې اغېزمن وبلل.
د یادونې وړ ده، چې په دې وروستیو کې د ننګرهار پوهنتون بېلابېلو برخو کې د پوهنتون د داخلي منابعو او همکارو ادارو په مرسته رغنیزې او ودانیزې چارې په چټکۍ سره پر مخ روانې دي.
سرچینه: د اطلاعاتو، نشراتو او عامه اړیکو آمریت