د ننګرهار پوهنتون مشرتابه ددې پوهنتون له اداري او خدماتي کارکوونکو سره غونډه وکړه.
په نوموړې کاري ناسته کې، چې د یادو کارکوونکو د چارو ارزونې، ستونزو اورېدو، تشویق او کارونو ته د هغوی متوجه کولو په موخه جوړه شوې وه، په کې د ننګرهار پوهنتون رئیس، مرستیالانو، د بېلابېلو پوهنځیو، آمریتونو او څانګو خدماتي کارکوونکو، د هغوی آمرینو او د پوهنتون د خدماتي چارو نظارت کوونکي هیئت برخه لرله.
مجلس ته د وینا پر مهال د ننګرهار پوهنتون رئیس شــ/یخ انعام الله مدني د پوهنتون له ټولو خدماتي کارکوونکو مننه وکړه، چې د زیار او هلو ځلو له کبله یې د پوهنتون چاپېریال او اداري شعبات منظم او پاکوالي ته یې پاملرنه کیږي.
نوموړي ټولو خدماتي کارکوونکو ته د یووالي، یو بل ته ښه نیت درلودلو، په چارو کې د همغږي اوسېدو، د خدماتي چارو ګړندیتوب او د خپلو امرینو اطاعت سپارښتنې وکړې او هغوی ته یې د ملاتړ او همکارۍ ډاډ ورکړ.
د ننګرهار پوهنتون د مالي او اداري چارو مرستیال پوهنیار قاضي خالد صداقت د خپلو خبرو پر مهال خدماتي کارکوونکي په خپلو کاري ساحو کې نیمګړتیاوو، ستونزو او مسؤلیتونو ته متوجه کړل او سپارښتنه یې ورته وکړه، چې ورسپارل شوې دندې په ټاکلي وخت او لازم شکل سرته ورسوي.
د غونډې په وروستۍ برخه کې د خدماتي کارکوونکو او د هغوی له چارو څخه د ارزونې په موخه د ټاکل شوي هیئت وړاندیزونه واورېدل شول او همدارنګه د پوهنتون د خدماتي برخې کارکوونکو د چارو د ښه والي په موخه نظریات وړاندې شول.
سرچینه: د عامه اړیکو، اطلاعاتو او نشراتو امریت
