د ننګرهار پوهنتون تدریسي روغتون او عمر ځلاند روغتیايي علومو انستیتیوت تر منځ د ګډو همکاریو تفاهملیک لاسليک شو.
د مسولینو په خبره، د یاد تفاهملیک له مخې به دواړه بنسټونه د یو کال لپاره د محصلینو روزنې، هغوی ته د عملي زده کړو زمینې برابرولو، د بشري سرچینو د ظرفیت لوړونې او ناروغانو ته د غوره روغتیايي چوپړتیاوو وړاندې کولو سربېره یادې ادارې د خپلو اهدافو ترلاسه کولو په موخه یو د بل له امکاناتو څخه استفاده کوي.
یاد هوکړه لیک د ننګرهار پوهنتون د علمي چارو مرستیال پوهندوی مـولوي احسان الله ناصح او د عمر ځلاند روغتیايي علومو انستیتیوت د علمي او تدریسي مرستیال ډاکتر عزیز احمد حکیمي تر منځ، چې پر مهال یې د ننګرهار پوهنتون رئیس شیخ انعام الله مدني او د یاد انستیتیوت بنسټګر متخصص ډاکتر محمد اسماعیل حکیمي هم حضور درلود، لاسلیک شو.
د ننګرهار پوهنتون رئیس شــيخ انعام الله مدني د خپلو خبرو پر مهال هیله څرګنده کړه، چې د یاد تفاهملیک په پلي کېدو سره به محصلین په منل شویو روغتیايي معیارونو سمبال شي، دواړو بنسټونو کې به هر اړخیز پرمختګونه رامنځ ته او ناروغانو ته د غوره معالجوي خدمتونو زمینه برابره شي.
د عمر ځلاند روغتیايي علومو انستیتیوت بنسټګر متخصص ډاکتر محمد اسماعیل حکیمي د یاد تفاهملیک په لاسلیک کېدو خوښي وښوده او ژمنه یې وکړه، چې په هوکړه لیک کې د شته مواردو پلي کېدو په برخه کې به په بشپړه توګه هلې ځلې ترسره کړي.
سرچینه : د عامه اړیکو، اطلاعاتو او نشراتو امریت
