د ننګرهار پوهنتون او تابش پوهنتون تر منځ د ګډو همکاریو تفاهملیک لاسليک شو.
د مسؤلينو په وينا، د ياد تفاهملیک له مخې به دواړه بنسټونه د یو کال لپاره په علمي، تدریسي، څېړنو او نورو برخو کې له یو بل سره همکاري کوي.
یاد هوکړه لیک د ننګرهار پوهنتون د رئیس پوهاند دوکتور خلیل احمد بهسودوال او د تابش پوهنتون رئیس دوکتور خیرمحمد مومند له خوا د زمري په ۳مه نېټه د پوهنتون په ریاست مقام کې لاسلیک شو.
د تابش پوهنتون رئیس دوکتور خیرمحمد مومند ننګرهار پوهنتون په تاریخي او علمي لحاظ د هېواد دویم ستر پوهنتون یاد کړ او په تېر کې یې له خپلې تحصیلي موسسې سره ددې پوهنتون د مرستو او همکاریو یادونه وکړه.
نوموړي د مننې تر څنګ وویل: خوښ دی، چې له ننګرهار پوهنتون سره د همکارۍ او همغږۍ یو بل پړاو ته داخلېږي او په راتلونکې کې یې د لا زیاتو همکاریو غوښتنه وکړه.
د ننګرهار پوهنتون رئیس پوهاند دوکتور خلیل احمد بهسودوال د پوهنتونونو او تحصیلي بنسټونو تر منځ د متقابلو اړیکو او همکاریو پر ارزښت خبرې وکړې او د تابش پوهنتون مسؤلینو ته یې په اړوندو برخو کې د مرستې او همکارۍ ډاډ ورکړ.
د یادونې وړ ده، چې په نوموړي مجلس کې د ننګرهار پوهنتون د علمي چارو مرستیال پوهندوی احسان الله ناصح، د اداري او مالي چارو مرستیال پوهنیار قاضي خالد صداقت او د تابش پوهنتون د علمي چارو مرستیال محب الله الله یار هم برخه لرله.
