ننګرهار پوهنتون کې د ۱۴۰۳ لمریز کال کانکور ازموینې لپاره د بایومتریک معلوماتو د ثبت لړۍ پیل او په چټکۍ سره پر مخ روانه ده.
یاده پروسه نن سهار له ټاکلي وخت یو ساعت وړاندې د سهار په ۵ بجو پیل شوه، چې دوه ورځې به دوام وکړي او په ترڅ کې به یې د کانکور ازموینې (۹۴۹۰) تنه ګډونوال بایومتریک شي.
د ننګرهار پوهنتون رئیس شــ/یخ انعام الله مدني ددې پوهنتون د علمي چارو مرستیال پوهندوی مـــ/ـــولوي احسان الله ناصح، مالي او اداري چارو مرستیال پوهنیار قاضي خالد صداقت، د محصلانو چارو مرستیال پوهنیار حافظ سید محمد قاسم هاشمي او د ازموینو ملي ادارې د مالي او اداري چارو رئیس مــ/ــولوي معلم احمد حقــ/ـــاني په ملتیا له یادې پروسې لیدنه وکړه او د بایومتریک ټیم له غړو د مننې تر څنګ یې هغوی ته د یاد بهیر د لا ښه والي، نظم او بهبود په خاطر اړینې لارښوونې او سپارښتنې وکړې.
د ننګرهار د کانکور ازموینې بایومتریک پروسه د چنګاښ/ سرطان په (۱۲ او ۱۳) نېټه د سه شنبې او چهار شنبې په ورځو او د کانکور ازموینه د چنګاښ / سرطان په (۱۴ــ ۱۵ــ ۱۶ مه) نېټه، چې د پنج شنبې، جمعې او شنبې ورځو سره سمون لري، په ننګرهار پوهنتون کې اخیستل کېږي.
د یادونې وړ ده، چې سږ کال به د ننګرهار پوهنتون بېلابېلو پوهنځیو ته په ورځنۍ، شپې او اختصاصي دورو کې په مجموعي توګه (۴۸۵۵) تنه جذب شي.
سرچینه: د عامه اړیکو، اطلاعاتو او نشراتو آمریت
