ننګرهار پوهنتون کې د والیبال سیالۍ پیل شوې.
د لوړو زده کړو وزارت د تضمین کیفیت پروسې په تازه درجه بندۍ کې د ننګرهار پوهنتون لومړي مقام اخیستلو په ویاړ د سپورت او بدني روزنې آمريت له خوا د دې پوهنتون د مختلفو پوهنځیو د محصلینو څخه د جوړو شویو شپږو لوبډلو تر منځ د والیبال سیالۍ پیل شوې، چې د مسؤلینو په وینا ۶ ورځې به دوام وکړي.
د یادو سیالیو د پرانیستې په مراسمو کې د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي، د محصلانو چارو آمر مولوي سعید الله عمري، د سپورت او بدني روزنې آمر محمد نسیم کاکړ، محصلینو او د والیبال لوبې مینه والو ګډون کړی و.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي د خپلې وینا پر مهال سپورت او فزیکي فعالیتونه د جسمي او رواني روغتیا په برقرارۍ کې اړین وبلل او دا یې د ټولنیزو اړیکو د پیاوړتیا او ورورګلوۍ فضا رامنځ ته کېدو لپاره مناسبه چاره یاده کړه.
نوموړي د یادو سیالیو د دایرېدو له کبله د سپورت او بدني روزنې امریت له مسؤلینو د مننې تر څنګ محصلینو ته سپارښتنه وکړه، چې د لوبو پر مهال اسلامي او سپورتي اخلاق مراعت کړي او د لوبو تر څنګ ډېر تمرکز خپلو زده کړو ته وکړي، چې هغه یې اساسي هدف دی.
د پرانیستې له مراسمو څخه وروسته، د سعد بن ابي وقاص (رض) او خباب بن الأرت (رض) لوبډلې د سیالۍ ترسره کولو په موخه میدان ته ښکته شوې.
سرچینه : د عامه اړیکو، اطلاعاتو او نشراتو امریت
