ننګرهار پوهنتون کې د نیالګیو کرلو کمپاین پیل شو.
د پوهنتون د مسؤلینو په وینا، د یاد کمپاین په ترڅ کې به سږ کال شاوخوا (۱۰۰۰۰) لس زره بېلابېل مېوه لرونکي او زینتي بوټي د دې پوهنتون په مرکزي کمپس او اړوندو پوهنځیو کې کېنول شي.
یاد کمپاین د پوهنتون ریاست په هدایت د چاپېریال ساتنې مرکزي کمېټې او حفظ و مراقبت مدیریت په ګډو هلو ځلو پیل شو، چې پرانیسته یې د پوهنتون د رئیس، مرستیالانو او نورو مسؤلینو له لوري وشوه.
د کمپاین د پرانیستې پر مهال د ننګرهار پوهنتون رئیس شیخ انعام الله مدني د اقلیم په مثبت تغیر، کرنې، اقتصاد او نورو بېلابېلو برخو کې د نیالګیو کېنولو په ارزښت او اهمیت خبرې وکړې.
نوموړي وویل: دا د ټولو هېوادوالو مسؤلیت دی، چې د چاپېریالي ښکلا، سمسورتیا او خوندیتوب لپاره په خپلو نومونو یو یو نیالګی کېنوي او د هغې ساتنه او پالنه وکړي.
ښاغلي مدني همدارنګه د چاپېریال ساتنې کمېټې، حفظ و مراقبت مدیریت مسؤلینو او کمپاین کې مشغولو کارګرانو څخه مننه وکړه، چې د پوهنتون ښېرازۍ په برخه کې ستړیاوې ګالي.
ورپسې د نیالګیو کرلو کمپاین پرانیسته وشوه او د پوهنتون مشرتابه غړو او نورو مسؤلینو په خپلو نومونو یو یو نیالګی په ټاکل شویو ځایونو کې نهال کړ.
