ننګرهار پوهنتون طب پوهنځي کې (د ریسرچ میتودولوژي) تر سرلیک لاندې ۱۲ ورځنی ورکشاپ جوړ شو.
یاد ورکشاپ د WHO ادارې په تخنیکي مرسته د طب پوهنځي د ادارې له خوا جوړ شوی، چې د یاد پوهنځي ۴۰ تنه استادان په کې برخه لري.
د ورکشاپ پرانیسته د ننګرهار پوهنتون د رئیس پوهاند دوکتور خلیل احمد بهسودوال په وینا سره وشوه. نوموړي دایر شوی ورکشاپ د څېړنې د نویو میتودونو د زده کړې په برخه کې د استادانو د ظرفیت لوړونې لپاره اړین وباله.
پوهاند بهسودوال د طب پوهنځي د مسؤلینو مننه وکړه، چې د څېړنو او نورو بېلابېلو برخو کې د استادانو او محصلینو د ظرفیت لوړونې لپاره کار کوي.
د طب پوهنځي رئیس پوهنوال ډاکتر محمد عظیم عظیمي د ورکشاپ د محتوا په اړه ګډونوالو استادانو ته معلومات ورکړل او زیاته یې کړه، چې له دې ورکشاپ وړاندې یې درې نور ۱۲ ورځني ورکشاپونه په یاده برخه کې د طب پوهنځي محصلینو ته دایر کړي، چې په ترڅ کې یې ۱۱۰ تنه محصلین وروزل شول.
د یادونې وړ ده، چې د نوموړي ورکشاپ د روزنې چارې د ننګرهار پوهنتون طب پوهنځي د استادانو له خوا پر مخ وړل کېږي.
