د کابل نړیوال ښوونځي زده کوونکو ننګرهار پوهنتون کې په خپلو نومونو نیالګي کېنول.
یاد زده کوونکي د ښوونځي د آمر مولوي ابو معاویه نقیب الله په ملتیا ننګرهار پوهنتون ته راغلل او د پوهنتون په انګړ کې یې لسګونه مېوه لرونکي او زینتي بوټي په خپلو نومونو کېنول.
د ننګرهار پوهنتون د علمي چارو مرستیال پوهنمل احسان الله ناصح او د محصلانو چارو مرستیال پوهنوال سید اکرم هاشمي د زده کوونکو ددغه نېک احساس ستاینه او قدردانی وکړ او زیاته یې کړه، چې د پوهنتون د ساتنې او څارنې مدیریت کارکوونکي به د یادو بوټو په سمه توګه ساتنه او پالنه وکړي.
دغه راز د ننګرهار پوهنتون د عامه ادارې او پالیسۍ پوهنځي د څلورم ټولګي محصل سید مصطفی هاشمي او ټولګیوالو یې د مالټو او سنبل ګل بوټي ننګرهار پوهنتون ته ډالۍ کړل، چې د پوهنتون مشرتابه ترې مننه وکړه او اړوندو مسؤلینو ته یې په ټاکلو ځایونو کې د هغې د کېنولو سپارښتنه وکړه.
