د ننګرهار پوهنتون کرنې پوهنځي جدیدالشمول محصلینو ته د ښه راغلاست او پوهنتون پېژندنې غونډه جوړه شوه.
د یادې غونډې پر مهال چې په کې د ننګرهار پوهنتون د رئیس او محصلانو چارو مرستیال سربېره د کرنې پوهنځي مسؤلینو، استادانو او ګڼو محصلینو برخه درلوده، د پوهنتون مشرتابه نویو راغلو محصلینو ته د راتلونکي تحصیلي بهیر په هکله اړینې سپارښتنې وکړې.
د ننګرهار پوهنتون رئیس شيخ انعام الله مدني غونډې ته د خپلې وینا پر مهال جدیدالشمول محصلینو ته د هرکلي ویلو تر څنګ هغوی ته د پوهنتون اکاډمیک چاپېریال سره ځان عیارولو، روزنیزو امکاناتو او فرصتونو څخه فوق العاده ګټې اخیستنې، مطالعې ته وخت ورکولو، مسؤلیتونو پر وخت ترسراوي او اصولو رعایت اړوند سپارښتنې وکړې.
نوموړي د زراعت په اهمیت ټینګار وکړ او محصلین یې وهڅول، چې د خپلې تحصیلي دورې پر مهال په زده کړو کې پوره هڅه وکړي او د هیواد په زراعتي پرمختګ کې ونډه واخلي.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي په خپلو خبرو کې نویو راغلو محصلینو ته د هر راز ستونزو د حل ډاډ ورکړ او د حسنه اخلاقو او ضوابطو پیروۍ په هکله یې هغوی ته بېلابېلې سپارښتنې وکړې.
د غونډې په پای کې د کرنې پوهنځي مسؤلینو له لوري جدیدالشمول محصلینو ته د پوهنتون او پوهنځي د مختلفو څانګو، خدماتو، سهولتونو او امکاناتو په اړه معلوماتي پرېزنټېشن وړاندې شو.
