د ننګرهار پوهنتون ښوونې او روزنې پوهنځي استادانو ته د څېړنې مېتودولوژي ۴ ورځنی ورکشاپ پای ته ورسېد.
د مسؤلینو په وینا، په دغه ورکشاپ کې د یاد پوهنځي د ټولو څانګو ۶۰ تنو استادانو ګډون کړی و، چې د څېړنې نویو او عصري مېتودونو اړوند یې مهارتونه لوړ او پوهه ترلاسه کړه.
د ورکشاپ په وروستۍ ورځ د ننګرهار پوهنتون د ښوونې او روزنې پوهنځي رئیس پوهنمل محمد اسحق شهیدزوی د خپلې وینا پر مهال د استادانو د څېړنیزو وړتیاوو لوړولو په برخه کې د یاد ورکشاپ په اړتیا او اهمیت خبرې وکړې او د استادانو د مسلکي وړتیا زیاتوالي لپاره یې د ورته نورو ورکشاپونو د جوړولو ژمنه وکړه.
نوموړي ګډونوالو ته سپارښتنه وکړه، چې د ورکشاپ پر مهال زده کړي مسایل عملي او پر مهمو موضوعاتو تحقیقات ترسره کړي.
غونډه د پوهنځي رهبرۍ غړو له لوري د ورکشاپ ګډون کوونکو استادانو ته د سندونو په ورکړې سره پای ته ورسېده.
