د ننګرهار پوهنتون مشرتابه ددې پوهنتون د محصلینو په لاس جوړو شویو ماډلونو څخه لیدنه وکړه.
د ننګرهار پوهنتون رئیس او مرستیالانو د ښوونې او روزنې پوهنځي تدریسي او اداري چارو څخه د نظارت سربېره د یاد پوهنځي فزیک څانګې د یو شمېر محصلینو په لاس جوړو شویو ماډلونو څخه لیدنه وکړه.
د ننګرهار پوهنتون رئیس شیخ انعام الله مدني د پوهنځي مسؤلینو او استادانو ته بېلابېلو برخو کې د لارښوونو تر څنګ د مبتکرو محصلینو وړتیاوې وستایلې او هغوی یې وهڅول، چې خپلې تخلیقي وړتیاوې لا پیاوړې او خپلې نظري زده کړې په عملي توګه تطبیق کړي.
نوموړي د محصلینو نوښتونه وستایل او د هڅونې په موخه یې ورسره نغدي مرسته وکړه.
د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار او د اداري او مالي چارو مرستیال مفتي نعمت الله اعزازي په خپلو خبرو کې محصلینو ته سپارښتنه وکړه، چې خپل تجارب او تخنیکي مهارتونه سره شریک او په ګډه توګه څېړنې ترسره کړي.
د فزیک څانګې یادو محصلینو د خپلو جوړ کړیو ماډلونو په اړه د پوهنتون رهبرۍ ته معلومات ورکړل او زیاته یې کړه، چې د چارو د بشپړېدو وروسته به جوړ کړي ماډلونه نندارې ته وړاندې کړي.
نوموړو د پوهنتون مشرتابه څخه غوښتنه وکړه، چې د نورو پرمختللو تجربو او اختراعاتو لپاره ورته اړین امکانات چمتو کړي، چې د هغوی لخوا ورته ډاډ ورکړل شو.
