د ننګرهار پوهنتون مشرتابه ددې پوهنتون د شرعیاتو، حقوقو او سیاسي علومو پوهنځیو څخه لیدنه او ارزونه وکړه.
د ننګرهار پوهنتون رئیس د علمي چارو، اداري او مالي چارو او محصلانو چارو مرستیالانو په ملتیا ددې پوهنتون د شرعیاتو، حقوقو او سیاسي علومو پوهنځیو د علمي او اداري چارو څخه لیدنه وکړه او د یادو پوهنځیو په تحصیلي او اداري چارو کې د پرمختګونو او ستونزو په اړه یې معلومات ترلاسه کړل.
دواړو پوهنځیو څخه د لیدنې پر مهال د مسؤلینو له خوا د پوهنتون رهبرۍ ته د خپلو فعالیتونو، پرمختګونو او لاسته راوړنو په اړه معلوماتي پرېزنټېشنونه وړاندې شول او د پوهنځیو ستونزې او وړاندیزونه هم ورسره شریک شول.
د ننګرهار پوهنتون رئیس شـیخ انعام الله مدني د خپلو ویناوو پر مهال د یادو پوهنځیو د لاسته راوړنو له کبله د مسؤلینو مننه وکړه، د ستونزو د حل ډاډ یې ورکړ او هغوی یې په چارو کې نورو نوښتونو او پرمختګونو ته وهڅول.
نوموړي مسؤلینو ته په چارو کې د همغږي اوسېدو، استادانو او محصلانو ته د ظرفیت لوړونې برنامو تطبیقولو او د محصلینو ستونزو او اړتیاوو رفع کولو په اړه سپارښتنې او لارښوونې وکړې.
د ننګرهار پوهنتون د علمي چارو مرستیال پوهندوی مـولوي احسان الله ناصح، د اداري او مالي چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي د خپلو ویناوو پر مهال د استادانو مسلکي روزنې، استادانو او محصلینو ته د غوره تسهیلاتو چمتو کولو، ګټورو پلانونو پلي کولو او غوره تحصیلي او اداري خدماتو وړاندې کولو اړوند د همکاریو او جدي اقداماتو ژمنې وکړې.
د لیدنې په پای کې د پوهنتون رهبرۍ د یادو پوهنځیو بېلابېلې برخې، څانګې او مدیریتونه وکتل او د هغوی فعالیتونه یې وارزول.
سرچینه: د عامه اړیکو، اطلاعاتو او نشراتو آمریت
