د ننګرهار پوهنتون محصلینو ته (د وحې مختلفو ډولونو پېژندنه) تر سرلیک لاندې ديني او معلوماتي سيمینار دایر شو.

یاد سيمینار د محصلانو خدمتونو انسجام امریت په نوښت د ښوونې او روزنې پوهنځي شاوخوا ۳۰۰ تنو محصلینو ته د یاد پوهنځي د غونډو په تالار کې دایر شو، چې د پوهنځي رهبرۍ سربېره په کې یو شمېر استادانو، آمرینو او محصلینو ګډون کړی و. د سيمینار د پرانیستې وینا پر مهال د ننګرهار پوهنتون د ښوونې او روزنې پوهنځي رئیس پوهندوی محمد اسحق شهیدزوی یاد سيمینار د محصلینو دیني پوهې زیاتوالي، اسلامي عقیدې پیاوړتیا او د ټاکلې موضوع اړوند د غلطو نظریاتو او شبهاتو په مخنیوي کې ګټور او اغېزناک وباله. نوموړي د سيمینار ارایه کوونکي استاد او تنظیموونکو څخه مننه وکړه، چې په یاده اړینه موضوع یې محصلینو لپاره علمي برنامه جوړه کړې ده. د سيمینار وړاندې کوونکي او د ننګرهار پوهنتون د شرعیاتو پوهنځي د اسلامي ثقافت څانګې استاد پوهنیار مولوي محمودالحسن دیوبندي د موضوع د تشریح پر مهال د وحې تعریف، ډولونو، قرانکریم او نبوي احادیثو څخه د هغې اثبات او نورو برخو په اړه معلومات ارایه کړل او د وحې د منکرینو اعتراضاتو ته یې د رد دلایل وړاندې کړل. نوموړي په پای کې د محصلینو او سيمینار د ګډونوالو پوښتنې هم ځواب کړې.