د ننګرهار پوهنتون محصلینو ته (د ازموینې اندېښنو سره د مقابلې لارې چارې) تر سرلیک لاندې سيمینار ارایه شو.
یاد سيمینار د لوړو زده کړو وزارت او ننګرهار پوهنتون ریاست مقام په لارښوونه او د محصلانو خدمتونو همغږۍ امریت په نوښت د۱۴ ګونو پوهنځیو جدید الشمول محصلینو ته د ښوونې او روزنې پوهنځي یو تن استاد له لوري د پوهنتون په جامع مسجد کې وړاندې شو.
په دې سيمینار کې د ننګرهار پوهنتون د محصلانو چارو مرستیال سربېره یو شمېر استادانو او سلګونه تنو محصلینو برخه لرله.
د سيمینار د پرانیستې وینا پرمهال د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي یاد سيمینار محصلینو لپاره پر ځان د باور لوړولو، ذهني ثبات ټینګښت او له ازموینې وړاندې د رواني فشار او اندېښنو مهارولو په برخه کې مهم او ګټور وباله.
نوموړي د سيمینار ارایه کوونکي استاد څخه د مننې ترڅنګ محصلینو ته سپارښتنه وکړه، چې د سيمینار پر مهال خپلې نیمګړتیاوې او اندېښنې له منځه یوسي او په خپلو درسي فعالیتونو برلاسي ومومي.
د ننګرهار پوهنتون د ښوونې او رزونې پوهنځي د ارواپوهنې او پیداګوژي څانګې استاد پوهنمل دوکتور حکیم خان حقیار د سيمینار د ارایې پر مهال د ازموینې اندېښنې تعریف، مفهوم، اندېښنې پېژندلو، د اندېښنې پیدا کېدو عواملو او د هغې د مخنیوي لارو چارو په اړه معلومات وړاندې کړل.
نوموړي له استادانو، ارواپوهانو او اړونده برخه کې متخصصینو څخه د مرستې غوښتنه، د ازموینو ډول ته پاملرنه، فزیکي فعالیتونه، استقامت، مثبت افکار، پر هڅو زیات تمرکز، دعا، اذکار او د عمل او نیت اصلاح د ازموینو د اضطراب لمنځه وړلو کې ګټور فکټورونه یاد کړل.
د سيمینار په پای کې په عملي توګه د اندېښنو پر وړاندې د ارامتیا احساسولو تمرینونه اجراء شول او د محصلینو پوښتنې ځواب شوې.
