د ننګرهار پوهنتون محصلینو ته د ازموینې اضطراب لمنځه وړلو په هکله معلوماتي او روزنیز سيمینار دایر شو.
یاد سيمینار د لوړو زده کړو محترم وزارت د هدایت او د ننګرهار پوهنتون ریاست مقام لارښوونې په اساس د محصلانو خدمتونو او همغږۍ امریت په هڅو سلګونو تنو محصلینو ته د ښوونې او روزنې پوهنځي د ارواپوهنې او پیداګوژي څانګې استاد پوهنمل نصیب الله ذکي له لوري د پوهنتون د غونډو په عمومي تالار کې وړاندې شو.
د ننګرهار پوهنتون د محصلانونو خدمتونو او همغږۍ آمر قاري بشير احمد احمدي د پرانيستې وينا پر مهال د ازموینو اضطراب د محصلینو د علمي پرمختګ پر وړاندې یوه رواني ننګونه ياده کړه، چې په وينا يې بايد مدیریت شي او دوی به د ورته علمي او روزنیزو پروګرامونو له لارې د محصلینو ذهني او رواني حالت ته زيات پام وکړي.
نوموړي د سيمينار ارايه کوونکي استاد څخه مننه وکړه او له محصلینو يې وغوښتل، چې د دا ډول برنامو او فرصتونو اعظمي ګټه واخلي.
استاد ذکي د سيمینار د ارایې پر مهال د ازموینې اضطراب / اندېښنې مفهوم پېژندنې، نښو، د اندېښنو پیدا کېدلو عواملو او د هغې د مخنیوي لارو چارو په اړه هر اړخیز معلومات وړاندې کړل.
سيمینار کې وویل شول، له استادانو، ارواپوهانو او د اړوندې برخې متخصصینو څخه د مرستې غوښتنه، د ازموینو ډول ته پاملرنه، فزیکي فعالیتونه، استقامت، مثبت افکار، پر هڅو زیات تمرکز، دعا، اذکار او د عمل او نیت اصلاح د ازموینو د اضطراب مدیریت کولو او لمنځه وړلو لپاره ګټور فکټورونه دي، چې محصلین باید ورته پام وکړي.
د سيمینار په پای کې محصلینو د موضوع اړوند له استاد څخه پوښتنې وکړې، چې د هغه له خوا ورته ځوابونه ورکړل شول.
سرچینه: د اطلاعاتو، نشراتو او عامه اړیکو امریت
