د ننګرهار پوهنتون له خوا د امارتي او خصوصي لېسو زده کوونکو ته د کانکور ملي ازموینې په اړه د عامه پوهاوي ورکشاپونه جریان لري.
د لوړو زده کړو محترم وزارت د رسمي هدایت له مخې ننګرهار پوهنتون د دې ولایت پوهنې ریاست سره په همغږۍ د امارتي او خصوصي لېسو زده کوونکو ته د کانکور ازموینې د نویو معلوماتو، مهمو تګلارو او یادې ازموینې ته د چمتووالي لارو چارو ورښودلو په موخه درې اوونۍ وړاندې د بېلابېلو ولسوالیو د مسلکي ودې (۴۸) تنو کارکوونکو ته روزنیز ورکشاپ دایر کړ، چې هغوی د خپلو اړوندو لېسو مسؤلینو پر مټ یاد معلومات تر زده کوونکو ورسوي.
د یادې پروسې په ترڅ کې له روزنې وروسته د ولسوالیو مسلکي ودې کارکوونکو د خپلو اړوندو ولسوالیو د لېسو مسؤلینو سره په ګډه د زده کوونکو پوهاوی پیل کړی، چې تر دې دمه د ګڼو امارتي او خصوصي لېسو زده کوونکو ته ورکشاپونه دایر شوي او پاتې ښوونځیو کې به هم دایر شي.
د ننګرهار ولایت د پوهنې ریاست د کیفیت لوړاوي آمر استاد دلاور مومند وایي، چې دا نوښت د لوړو زده کړو وزارت او ننګرهار پوهنتون له لوري یو ارزښتناک ګام دی، چې له مخې یې د کانکور ملي ازموینې اړوند اړینې لارښوونې، اساسي معلومات، د ازموینې ډول، د سوالونو بڼه او د چمتووالي اغېزمنې طریقې زده کوونکو ته رسېږي.
د نوموړي په وینا په ټولو لېسو کې په منظمه او موثره توګه ورکشاپونه جریان لري او زیاته یې کړه، چې د یادې پروسې له برکته به زده کوونکي د کانکور اوسني معیارونه، اصول، تګلارې او ذهني فشار سره د مبارزې مهارتونه زده کړي، چې دا به نه یوازې د دوی پایلو ته مثبت بدلون ورکړي، بلکې له ګډوډۍ، ناسم انتخاب او معلوماتي تشو هم مخنیوی وکړي.
