د ننګرهار پوهنتون علمي شورا نوبتي غونډه وکړه.
د نوموړې کاري ناستې پر مهال، چې ددې پوهنتون د رئیس په مشرۍ ترسره شوه او د پوهنتون مرستیالانو، د بېلابېلو پوهنځيو او تدریسي روغتون رئیسانو او استادانو په کې برخه لرله، د علمي او تدریسي چارو، علمي ترفیعاتو، تقرر او انفکاک کیسونو او يو شمېر نورو موضوعاتو په اړه بحث او پرېکړې وشوې.
د ننګرهار پوهنتون رئيس شــیــ/ــخ انعام الله مدني د مجلس د پرانیستې وینا پر مهال د ټولو پوهنځیو رئیسان خپلو دندو او مسؤلیتونو ته ځیر کړل، په ورځنیو چارو کې یې د پوهنځیو او پوهنتون ریاست تر منځ د پیاوړې هغمږۍ رامنځ ته کولو باندې ټینګار وکړ.
نوموړي دغه راز سپارښتنه وکړه، چې د ټولو پوهنځیو استادان باید د تېرې شل فیصده ازموینې پاتې پایلې ژر اعلان کړي.
د علمي چارو مرستیال پوهندوی احسان الله ناصح، د څېړنو او علمي مجلو مرستیال پوهنمل دوکتور کفایت الله کاکړ او د محصلانو چارو مرستیال پوهنیار حافظ سید محمدقاسم هاشمي د غونډې نور ویناوال وو، چې د خپلو خبرو پر مهال یې له مسؤلینو او استادانو غوښتنه وکړه، چې د لوړو زده کړو وزارت د کیفیت د تضمین او اعتبار ورکولو ریاست له لوري ننګرهار پوهنتون ته د هېواد په کچه په لوړو نمرو د اعتبار د ورکړل شوي سند ساتلو په برخه کې دوامداره هڅې وکړي او د پوهنځیو په کچه د ترسره شویو څېړنو او علمي کنفرانسونو ربعه وار راپورونه دې د پوهنتون له رهبرۍ سره شریک کړي.
کرنې، اقتصاد او انجنیري پوهنځیو کې د یو شمېر نویو دیپارتمنتونو ایجاد، د ځینو پوهنځیو د قراردادي استادانو تقرر او یو شمېر نور متفرقه مسایل هغه څه وو، چې د شورا پر مهال پرې بحث وشو.
د مجلس په وروستۍ برخه کې د ننګرهار، لغمان او بامیان پوهنتونونو د علمي ترفیعاتو۹، انفکاک ۲ او د تقرر ۶ کیسونه مطرح او په اړه یې لازمې پرېکړې وشوې.
سرچینه: د عامه اړیکو، اطلاعاتو او نشراتو امریت
