د ننګرهار پوهنتون علمي شورا د دې پوهنتون د رئیس په مشرۍ نوبتي غونډه وکړه.
په یاده غونډه کې، چې نن د وږي میاشتې په ۱۰ مه نېټه کرنې پوهنځي کې ترسره شوه او د پوهنتون د علمي چارو، محصلانو چارو، څېړنو او علمي مجلو او اداري او مالي چارو مرستیالانو سربېره په کې د پوهنځیو او تدریسي روغتون رئیسانو، شورا ته منتخبو استادانو او یو شمېر امرینو برخه لرله، پر مهال یې د پوهنتون په علمي، تدریسي او څېړنیزو مسایلو بحث وشو او د بېلابېلو پوهنتونونو د استادانو د علمي ترفیعاتو کیسونه په اړه پرېکړې وشوې.
د ننګرهار پوهنتون رئیس شیخ انعام الله مدني د مجلس د پرانیستې وینا پر مهال راتلونکي سمستر ته د بشپړ چمتووالي نیولو، پوهنتوني چارو کې د اسلامي امارت نافذه قوانینو او لوړو زده کړو وزارت مقام فرامینو تطبیق، د استادانو او محصلینو حاضرۍ کنټرول، تدریسي بهیر منظم پیل او ترې څارنې اړوند د پوهنځیو مسؤلینو ته لازمې لارښوونې او سپارښتنې وکړې.
د ننګرهار پوهنتون د علمي چارو مرستیال پوهنوال مولوي احسان الله ناصح شورا ته د پوهنتون د تېرې یوې میاشتې علمي فعالیتونو په هکله راپور وړاندې کړ او همدارنګه یې د نصاب اصلاح او قابل تدریس مضامینو په اړه د معلوماتو ورکولو تر څنګ اکاډمیکه برخه کې د روانو چارو لا مؤثریت په موخه مسؤلینو ته لارښوونې وکړې.
د ختیځ زون امارتي او خصوصي پوهنتونونو لپاره د لوړو زده کړو وزارت د دع.وت او ارشاد مسؤل او د ننګرهار پوهنتون د محصلانو چارو مرستیال شیخ شاکرالله وحدت د خپل معاونیت له خوا په ټولو پوهنځیو کې د ترسره شوې ارزونې په پایله کې د موندل شویو ستونزو په حل خبرې وکړې او استادانو او اداري کارکوونکو ته یې د جوړېدونکي دیني او علمي سيمینار د وخت او نېټې په هکله معلومات وړاندې کړل، چې ټاکل شوې یاد سيمینار سبا پیل شي.
د مجلس پر مهال د شورا غړو د تېرې شپې زلزلې د شهیدانو او ټپیانو کورنیو لپاره نغدي مرسته راټوله کړه او هم د پوهنتون مالي او اداري چارو مرستیال حافظ ناکیم خان سعید په مشرۍ کمېټه جوړه شوه، چې د پوهنتون له استادانو او اداري کارکوونکو د تېرې شپې قربانیانو ته د مالي او نغدي مرستې راټولو چارې مخ ته یوسي.
د مجلس په وروستۍ برخه کې د ننګرهار، کونړ سید جمال الدین افغاني، لغمان او نورستان پوهنتونونو د استادانو د علمي ترفیعاتو ۳۰ کیسونه مطرح کولو سربېره د پوهنتون اړوند د یو لړ متفرقه مسایلو په هکله بحثونه او لازمې پرېکړې وشوې.
