د ننګرهار پوهنتون علمي شورا د دې پوهنتون د رئیس په مشرۍ غونډه وکړه.
په ياده کاري ناسته کې، چې د روانې حمل میاشتې په ۲۴ مه نېټه ترسره شوه او د پوهنتون د علمي چارو او محصلانو چارو مرستیالانو، پوهنځيو او تدريسي روغتون رئیسانو، د شورا غړو او استادانو په کې برخه لرله، پر مهال یې د پوهنتون اړوند علمي او تدریسي موضوعاتو، د استادانو علمي ترفیعاتو او متفرقه مسایلو په اړه بحث او پرېکړې وشوې.
د ننګرهار پوهنتون رئیس شیخ انعام الله مدني د مجلس د پرانیستې وینا پر مهال د محصلینو او استادانو حاضریو په کنترول تاکید وکړ او اړوندې برخې ته یې د جدي پاملرنې سپارښتنه وکړه.
قدرمن شیخ صاحب همدارنګه وویل، د پوهنځیو رئیسان او نور مسؤلین باید پوهنتون ته د لوړو زده کړو محترم وزارت د نظارت او ارزونې ریاست څخه راغلي پلاوي سره بشپړه همکاري ترسره کړي، د پوهنځیو چارې په منظمه توګه مخ ته یوسي او د استادانو او محصلینو تر منځ عدالت تامین کړي.
د پوهنتون د علمي چارو مرستیال پوهنمل دوکتور قدرت الله عمرخېل او د محصلانو چارو مرستیال مولوي عبیدالله عابد د شورا غړو سره په ګډه د اجنډا له مخې د پوهنتون اړوند بېلابېلو علمي، تدریسي او متفرقه مسایلو په هکله بحثونه او پرېکړې وکړې.
د غونډې پر مهال د ننګرهار پوهنتون د پلان او پالیسۍ کمېټې مسؤلینو له لوري د ۱۴۰۵ کال تطبیقي پلان په هکله د پرېزنټېشن په شکل معلومات وړاندې او پوهاوی ترسره شو.
د مجلس په وروستۍ برخه کې د ننګرهار، لغمان او نورستان پوهنتونونو د استادانو د علمي ترفیعاتو ۶ کیسونه مطرح او په اړه یې لازمې پرېکړې وشوې.
سرچینه: د اطلاعاتو، نشراتو او عامه اړیکو امریت
