د ننګرهار پوهنتون شرعیاتو پوهنځي او امام ابو حنیفه رحمه الله ديني تخصصاتو جامعې استادانو ته (د څېړنې اساساتو پېژندنه او مقاله لیکنې) تر سرلیک لاندې ۳ ورځنی ورکشاپ پیل شو.
یاد ورکشاپ، چې نن د ننګرهار پوهنتون څېړنو او علمي مجلو معاونیت په نوښت د پوهنتون مسلکي زده کړو پرمختايي مرکز (PDC) کې پیل شو، د روزنې چارې یې د همدې پوهنتون د شرعیاتو او حقوقو او سیاسي علومو پوهنځیو درې تنو استادانو له خوا پرمخ وړل کېږي.
د ننګرهار پوهنتون د علمي چارو مرستیال پوهندوی مولوي احسان الله ناصح او د څېړنو او علمي مجلو مرستیال پوهندوی دوکتور سعید محمد وقار د ورکشاپ ګډونوالو ته په خپلو ویناوو کې وویل، چې د علمي څېړنو اصولو پېژندنه او عملي تطبیق یې د ديني او عصري علومو استادانو له بنسټیزو مسؤلیتونو څخه شمېرل کېږي او ټینګار یې وکړ، چې د پوهنتون اداره به د استادانو د مسلکي ظرفیت لوړولو او څېړنیزو وړتیاوو د پراختیا لپاره خپلې هلې ځلې دوامداره وساتي.
نوموړو د ورکشاپ په موخو او ګټو خبرې وکړې او ګډونوالو ته یې سپارښتنه وکړه، چې د ورکشاپ د محتوا مسایل او د څېړنې اړوند معیارونه په عملي توګه په خپلو مقالو او تحقیقاتو کې پلي کړي.
د غونډې په دویمه برخه کې روزونکو استادانو د ورکشاپ لپاره د ټاکلو موضوعاتو تشریح پیل کړه او د ورکشاپ په پای کې به په ګډونوالو عملي تمرینونه هم ترسره شي.
