د ننګرهار پوهنتون د ۱۴ ګونو پوهنځیو مسؤلینو ته د علمي پروګرامونو د بیاکتنې (ای پي ار) ورکشاپ دایر شو.
یاد ورکشاپ، چې د دې پوهنتون علمي چارو معاونیت په نوښت د پوهنتون په (پي ډي سي) مرکز کې ترسره شو، پر مهال یې د پوهنتون علمي پروګرامونو کلنۍ ارزونې او دوره یي بیاکتنې په موخو، محتوا، راپورونو لیکنې ترتیب، اړونده نورو مسایلو او تګلارو بحث او معلومات وړاندې شول.
په ورکشاپ کې همدارنګه د ننګرهار پوهنتون په هغو پروګرامونو هم خبرې وشوې، چې د ۱۴۰۴ کال لپاره د دوره يي بیاکتنې لاندې نیول کېږي.
د ننګرهار پوهنتون علمي چارو مرستیال پوهنوال م.ولوي احسان الله ناصح په خپله وینا کې د ورکشاپ دایرولو په اړتیا او اهمیت خبرې وکړې او هغه یې د پوهنتون علمي اعتبار ساتنې او کیفیت لوړاوي برخه کې ټاکلو معیارونو ته د رسېدنې لپاره حیاتي وباله.
نوموړي زیاته کړه، د علمي برنامو ارزونه او بیاکتنه د پوهنتون نیمګړتیاوو اصلاح، قوت نقاطو پېژندنې او پرمختګ رامنځ ته کېدو فرصتونه ایجادوي او لازمي ده، چې ټول پوهنځي په یاده دوامدراه پروسه کې ګړندۍ او موثره هڅې ترسره کړي.
په دې ورکشاپ کې د پوهنتون د ټولو پوهنځیو او تدریسي روغتون رئیسانو او کیفیت لوړاوي کمېټو آمرینو برخه لرله، چې د ننګرهار پوهنتون د وترنري علومو پوهنځي رئیس او استاد پوهنوال رضوان الله ممله وال له خوا ورته روزنه ورکړل شوه.
