د ننګرهار پوهنتون د ۱۴۰۰ تحصیلي کال د وروستي سمستر ازموينې پيل شوې.
د پوهنتون د مسؤلینو په وینا، نوموړې ازموینې چې درې اوونۍ به دوام وکړي، په ترڅ کې به یې د لیسانس دورې د ورځې او شپې او ماسترۍ پروګرامونو د څه دپاسه پنځلس زرو تنو محصلینو ازموینه واخیستل شي.
د ننګرهار پوهنتون رئیس پوهاند دوکتور خلیل احمد بهسودوال د علمي چارو مرستیال پوهنمل احسان الله ناصح او د محصلانو چارو مرستيال پوهنوال سيد اکرم هاشمي په ملتيا د يادو ازموينو نه د ليدنې پر مهال د پوهنځيو مسؤلینو او استادانو ته لارښوونه وکړه، چې ازموينې باید په پوره روڼتيا او شفافيت واخيستل شي او پايلې يې په خپل وخت له محصلينو سره شريکې شي.
پوهاند بهسودوال دغه راز د ازموینو کمېټې مسؤلینو ته سپارښتنه وکړه، چې د پوهنتون او پوهنځیو په کچه د ازموینو بهیر وڅاري او راپور یې وخت په وخت د پوهنتون له ادارې سره شریک کړي، چې د هغوى له خوا ورته په اړونده برخه کې د اجرااتو او همکارۍ ډاډ ورکړل شو.
