د ننګرهار پوهنتون د ۱۳۹۹-۱۴۰۰ تحصیلي کال د لومړي سمستر ازموينې پيل شوې.
د پوهنتون د مسؤلینو په وینا، نوموړې ازموینې چې درې اوونۍ به دوام وکړي، په ترڅ کې به یې د لیسانس او ماسترۍ دورې د نږدې پنځلس زرو تنو محصلینو ازموینه واخیستل شي.
د ننګرهار پوهنتون رئیس پوهاند دوکتور خلیل احمد بهسودوال د علمي چارو د مرستیال پوهندوی دوکتور محمد حامد کډوال، د محصلانو چارو مرستيال پوهنوال سيد اکرم هاشمي او د ازموينو کمېټې د مشر پوهاند احمد ګل واثق په ملتيا د يادو ازموينو نه د ليدنې پر مهال د پوهنځيو مسؤلینو او استادانو ته لارښوونه وکړه، چې ازموينې باید په پوره روڼتيا او شفافيت واخيستل شي او پايلې يې په خپل وخت له محصلينو سره شريکې شي.
پوهاند بهسودوال د ازموینو کمېټې مسؤلینو ته سپارښتنه وکړه، چې د پوهنځيو د کمېټو سره په ګډه د ازموينو بهير په جدي توګه وڅاري او د شفافيت لپاره يې تر ممکنه حده هلې ځلې وکړي، چې د هغوی له خوا ورته په اړونده برخه کې د لازمو اجرااتو ډاډ ورکړل شو.
