د ننګرهار پوهنتون د کیفیت لوړاوي کمېټې نوبتي غونډه وکړه.
د ننګرهار پوهنتون کیفیت لوړاوي کمېټې د دې پوهنتون د علمي چارو مرستیال په مشرۍ غونډه وکړه، چې پر مهال یې د پوهنځیو کلنۍ او خودي ارزونو پایلو، د پوهنتون داخلي ارزونې ترسره کولو، نړیوالو ژورنالونو ته د استادانو او محصلینو لاسرسي او یو شمېر نورو مواردو په اړه بحث او پرېکړې وشوې.
د ننګرهار پوهنتون د علمي چارو مرستیال پوهنوال مولوي احسان الله ناصح غونډې ته په وینا کې د ارزونې پر اهمیت وغږېد او ټینګار یې وکړ، چې له ارزونې پرته د پرمختګ لپاره د اغېزناکو پلانونو جوړول، د نیمګړتیاوو اصلاح او مطلوبو پایلو ته رسېدنه ناشونې ده.
نوموړي سپارښتنه وکړه، چې ټول پوهنځي باید د کلنیو او خودي ارزونو پایلې د پوهنتون کیفیت لوړاوي داخلي واحد سره شریکې کړي، چې هغوی یې توحید او لوړو زده کړو محترم وزارت مقام ته واستوي.
د غونډې پر مهال د نوي فارمټ له مخې د خودي ارزونې ترسراوي، پوهنځیو کې د مربوطه اسنادو تنظیم، د فعالیتونو شواهد او اسناد جوړولو، اړونده برخه کې د عملي ګامونو اخیستو په اړه بحثونه ترسره او پرېکړه وشوه، چې راتلونکې یکشنبه او دوشنبه دې د پوهنتون اداري او مستقل امریتونه وارزول شي او راتلونکې ارزونې ته دې هم کامل چمتووالی ونیول شي.
د غونډې په پای کې د ننګرهار پوهنتون د وترنري علومو پوهنځي استاد پوهنمل حنیف الله باوري د پوهنتون د کیفیت لوړاوي داخلي واحد مسؤل په توګه وټاکل شو او د ښه خدمت او بریالي ماموریت ترسره کولو ژمنه یې وکړه.
