د ننګرهار پوهنتون د نړیوال علمي ژورنال (Nangarhar University International Scientific Journal) د ایجاد چارې بشپړې او ډېر ژر به پر لیکه شي.
یاده خبره د علمي تحقیقاتو په برخه کې د لوړو زده کړو وزارت مقام سلاکار ډاکټر وسیم اقبال د ننګرهار پوهنتون رئیس پوهاند دوکتور خلیل احمد بهسودوال او د دې پوهنتون د نړیوال ژورنال اجرائیه بورد غړو سره د ویډیويي کنفرانس په ترڅ کې وکړه.
نوموړي د نړیوال علمي ژورنال د ایجاد په چاره کې ننګرهار پوهنتون له نورو پوهنتونونو مخکښ وباله او ددې پوهنتون له مشرتابه یې مننه وکړه، چې د یاد ژورنال چارې یې په ډېر ښه شکل په خپله مدیریت کړې.
ښاغلي اقبال د نوموړي ژورنال رامنځته کېدل د ننګرهار پوهنتون او د لوړو زده کړو ټولې کورنۍ ته ستره علمي لاسته راوړنه وبلله، چې په وینا یې، د نړیوالو مقالو د چاپ په برخه کې به د ننګرهار پوهنتون سربېره ورسره د نورو پوهنتونونو د استادانو ستونزه هم هواره شي.
د ننګرهار پوهنتون رئیس پوهاند دوکتور خلیل احمد بهسودوال د لوړو زده کړو وزارت مقام او د یاد وزارت سلاکار ښاغلي ډاکټر وسیم اقبال او د ننګرهار پوهنتون د نړیوال علمي ژورنال اجرائیه بورد د غړو استادانو مننه وکړه، چې په هلو ځلو یې یاد ژورنال رامنځته شو او اړوندو مسؤلینو ته یې دنده وسپارله، چې د پاتې چارو او خپراوي په برخه کې یې عاجل اقدامات ترسره کړي.
