د ننګرهار پوهنتون د شهیدو شویو محصلینو د کورنیو غړو د یاد پوهنتون له مشرتابه سره ولیدل.
د یادې لیدنې پر مهال، چې د ننګرهار پوهنتون په ریاست مقام کې ترسره شوه او د دې پوهنتون د رئیس سربېره په کې د اداري او مالي چارو مرستیال، یو شمېر منسوبینو او د شـهیدانو د کورنیو غړو حضور درلود، د شوې پېښې په څرنګوالي او د شهیدو شویو محصلینو په یاد او خاطراتو خبرې وشوې.
د ننګرهار پوهنتون رئیس شــيخ انعام الله مدني د خپلو خبرو پر مهال د یادې پېښې په رامنځ ته کېدو خواشیني څرګنده کړه، د محصلینو کورنیو ته یې د دغه ستر غم له کبله تعزیت څرګند کړ او هغوی ته یې د صبر او استقامت سپارښتنه وکړه.
نوموړي علم او عمر بې بدیله نعمتونه یاد کړل، ټولنې لپاره د باسواده ځوانانو په اړتیا یې خبرې وکړې او زیاته یې کړه، چې محصلین باید د ملګرتیا اړیکو پاللو پر ځای زیاته پاملرنه خپلو زده کړو ته وکړي.
د ننګرهار پوهنتون د اداري او مالي چارو مرستیال پوهنیار قاضي خالد صداقت د یادو محصلینو مړینه د پوهنتون لپاره ستره ضایعه وبلله او د هغوی له کورنیو سره یې ځان په غم کې شریک یاد کړ.
د شـهیدانو محصلینو د کورنیو غړو په خپلو خبرو کې د لوړو زده کړو وزارت مقام او د ننګرهار پوهنتون د رهبرۍ، استادانو، منسوبینو او محصلینو مننه وکړه، چې د یادې پېښې له کبله یې دوی سره خواخوږي څرګنده کړه او د دوی کورونو ته ورغلل.
د غوندې په پای کې د مجلس د ګډونوالو له خوا شهیدو شویو محصلینو ته په جمعي شکل دعا وشوه.
د یادونې وړ ده، چې د تېرې ثور میاشتې په ۳۰ مه نېټه د کابل ـــ جلال اباد پر لویه لار د سروبي ولسوالي په ساحه کې د ننګرهار پوهنتون څلور تنه محصلین په یوه ترافیکي پېښه کې شهیدان شول.
سرچینه : د عامه اړیکو، اطلاعاتو او نشراتو امریت
