د ننګرهار پوهنتون حقوقو او سیاسي علومو پوهنځي مسؤلینو، استادانو، د څانګو آمرینو او کمېټو مشرانو ته د تضمین کیفیت پروسې د معیارونو او چیک لیستونو د تشریح سیمینار دایر شو.
ددې سيمینار څخه هدف د پوهنتون په علمي، تدریسي او اداري برخو کې د تضمین کیفیت معیارونه په سمه توګه پلي کول، د خدماتو کیفیت لوړول او په چارو کې د ستونزو تشخیص او حلول دي.
سیمینار ته د وینا پر مهال د ننګرهار پوهنتون د علمي چارو مرستیال پوهندوی مولوي احسان الله ناصح وویل: د تضمین کیفیت پروسې ټول معیارونه په سمه او بشپړه توګه پلي کول نه یوازې دا چې د پوهنتون اعتبار لوړوي، بلکې د څېړنیزو فعالیتونو په پیاوړتیا او محصلینو ته د زده کړو معیاري سیستم رامنځ ته کېدو باندې مستقیمه اغېزه لري.
نوموړي د تضمین کیفیت پروسې په پرله پسې توګه پلي کول او له هغې څخه څارنه د پوهنتون په اعتبار ساتنه کې خورا مهمه چاره یاده کړه او سپارښتنه یې وکړه، چې راتلونکې ارزونه کې باید ټول پوهنځي او څانګې لوړې نومرې ترلاسه کړي.
د ننګرهار پوهنتون د حقوقو او سیاسي علومو پوهنځي رئیس پوهنمل سید بنارس هاشمي او استادانو په خپلو خبرو کې د تضمین کیفیت دوامداره پروسې ته د خپلې ژمنتیا څرګندونه وکړه او د یادې پروسې د معیارونو تطبیق د مخنیوي په برخه کې یې د پرتو خنډونو یادونه وکړه، چې د پوهنتون د علمي چارو مرستیال له لوري ورته د حل ډاډ ورکړل شو.
د سیمینار په دویمه برخه کې د ننګرهار پوهنتون د تضمین کیفیت آمر پوهنوال علي جان عادل د تضمین کیفیت پروسې د ټولو اصلي او فرعي معیارونو او نورو موادو د تشریح په هکله خپل چمتو کړی پرېزنټېشن ارایه او د ګډونوالو پوښتنو ته یې ځوابونه وویل.
سرچینه: د اطلاعاتو، نشراتو او عامه اړیکو آمریت
