د ننګرهار پوهنتون او نورو خصوصي پوهنتونونو ۳۹ تنو بې وزله محصلینو سره نغدي مرسته وشوه.

یاده مرسته د (HHRD) موسسې له لوري د ( زده کړې ملاتړ پروګرام ) په لړ کې ترسره شوه.
په همدې مناسبت د ننګرهار پوهنتون د غونډو تالار کې ددې پوهنتون د محصلانو خدمتونو انسجام امریت له لوري مراسم جوړ شوي وو، چې د ننګرهار پوهنتون رهبرۍ، د (HHRD) ادارې مسؤلینو او محصلینو په کې برخه اخیستې وه.
د ننګرهار پوهنتون د اداري او مالي چارو مرستیال پوهنیار قاضي خالد صداقت په خپلو خبرو کې د (HHRD) ادارې د یادې مرستې، په تېر کې محصلینو ته د امکاناتو برابرولو او مالي ملاتړ سربېره په پوهنتون کې د نوموړې موسسې له لوري د ترسره شویو رغنیزو فعالیتونو ستاینه او مننه وکړه.
نوموړي یاده مرسته جاریه صدقه وبلله او ترسره کوونکو ته یې د الله تعالی له درباره د اجر غوښتنه وکړه.
د (HHRD) ادارې مشر عبیدالله فیصل ننګرهار پوهنتون د ټولو افغانانو ګډ علمي کور یاد کړ او زیاته یې کړه، چې په همدې پوهنتون کې یې زده کړې کړي او خوښ دی، چې اوس یې د نورو همکارانو په ملتیا خدمت کوي.
د غونډې پر مهال د (HHRD) موسسې د ( زده کړې ملاتړ پروګرام ) مسؤل پاچا خان الفت د خپلې ادارې د فعالیتونو په اړه د غونډې برخوالو ته معلومات ورکړل او ژمنه یې وکړه، چې په راتلونکې کې به هم له پوهنتون سره همکاري کوي.
د غونډې په پای کې د پوهنتون رهبرۍ غړو او د یادې موسسې مسؤلینو په ګډه پر محصلینو نغدي مرسته ووېشله.