د ننګرهار پوهنتون استادانو، اداري کارکوونکو او محصلینو ته ۳ ورځنی ديني، علمي او اصلاحي سيمینار پیل شو.
یاد سيمینار، چې پر مهال به یې د هېواد جیدو علماء کرامو او افتخاري شیوخ کرامو له خوا د مختلفو دیني، علمي او اصلاحي موضوعاتو په هکله بیانونه او معلومات وړاندې شي، د ننګرهار پوهنتون د دعوت او ارشاد امریت په نوښت د پوهنتون په جامع مسجد کې جوړ شو.
د سيمینار پرانیستې وینا د ننګرهار پوهنتون د دعوت او ارشاد آمر مولوي اعجازالحق َزلِف وکړه، چې په خپلو خبرو کې د سيمینار په مقاصدو وغږېد او زیاته یې کړه، چې د دې درېورځني سيمینار څخه یې موخه د استادانو، محصلینو او اداري کارکوونکو د دیني، علمي او فکري کچې لوړول، د اسلامي احکامو، اخلاقو او طریقو تطبیق او د ټولنې د اصلاح لپاره د اسلامي لارښوونو ترویج دی.
نوموړي زیاته کړه، چې ننګرهار پوهنتون نه یوازې د لوړو زده کړو یو با اعتباره مرکز دی، بلکې د ځوان نسل ديني او سالمې فکري روزنې مهم بنسټ ګڼل کېږي، چې یاده برخه کې یې هم خپل رسالت په سمه توګه ترسره کړی.
د یاد سيمینار په لومړۍ ورځ د امام ابوحنیفه رحمه الله ديني تخصصاتو جامعې استاد شیخ القران مولوي شاهدالله حقاني د تقلید اهمیت او اړتیا او په اسلام کې د ږیرې اهمیت موضوعات وړاندې او د ګډونوالو پوښتنې یې ځواب کړې.
د سيمینار لومړۍ ورځ په دعا سره پای ورسېده.
د یادونې وړ ده، چې د ننګرهار پوهنتون د دعوت او ارشاد امریت له خوا ورته سيمینار طب پوهنځي کې هم استادانو او محصلینو ته دایر شو.
