د ننګرهار پوهنتون اداري مجلس د دې پوهنتون د رئیس په مشرۍ ترسره شو.
ه یاده کاري ناسته کې، چې د پوهنتون په ریاست مقام کې ترسره شوه او د دې پوهنتون د اداري او مالي چارو او محصلانو چارو مرستیالانو، د اړوندو پوهنځیو رئیسانو او یو شمېر آمرینو په کې برخه لرله، د پوهنتون اړوند پر بېلابېلو اداري، مالي او تدارکاتي مسایلو، د ادارې، مامورینو او محصلینو ستونزو حل او د لوړو زده کړو محترم وزارت پرېکړو تطبیق په هکله بحثونه وشول.
د مجلس د پرانیستې وینا پر مهال د ننګرهار پوهنتون رئيس شیخ انعام الله مدني د پوهنځیو او اړوندو څانګو مسؤلینو ته د اصولو سره سم د اداري او تدریسي چارو پرمخ وړلو او د استادانو، محصلینو او اداري کارکوونکو د صورت او سیرت اصلاح اړوند لازمې لارښوونې وکړې.
قدرمن شیخ صاحب همدارنګه مسؤلینو ته سپارښتنه وکړه، چې د پوهنتون له خوا جوړېدونکو دیني او علمي سيمینارونو کې باید استادان په پراخه کچه ګډون وکړي او اړونده مراجعو ته د خپلو کړنو او نور راپورونه په خپل وخت واستوي.
د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد مسؤل او د ننګرهار پوهنتون د محصلانو چارو مرستیال شیخ شاکرالله وحدت په خپله وینا کې وویل، چې د لوړو زده کړو وزارت د هدایت له مخې باید د ټولو پوهنځیو اجرائیه مدیرانو ته د (ایچ اي ایم آی ایس) یوزر جوړ او راتلونکو شل فیصده ازموینو لپاره حاضري هم له یاد انلاین سیستم څخه چاپ شي.
نوموړي همدارنګه د منفکۍ او تاجیل مسایلو اړوند موجوده ستونزې شریکې کړې او د محصلانو خدمتونو همغږۍ امریت سره د فارغانو شهرت شریکولو، ظرفیت لوړونې برنامو ته د محصلینو معرفي کولو او محصلانو چارو امریت سره د کاملې هماهنګۍ لرلو باندې یې ټینګار وکړ.
د مجلس په دویمه برخه کې د اداري او مالي چارو مرستیال حافظ ناکیم خان سعید په خپلو خبرو کې د تېر اداري مجلس د پرېکړو په تعقیب د شویو اجرااتو، د لوړو زده کړو وزارت رهبري شورا پرېکړو پلي کېدو او د پوهنتون چاپېریال ساتنې مرکزي کمېټې د فعالیتونو راپورونه ارایه کړل، چې د مجلس ګډونوالو له خوا تائید شول.
د مجلس په اخر کې ګډونوالو د اجنډا له مخې د پوهنتون اړوند مختلفو مسایلو په هکله خبرې وکړې او په اړه یې لازم تصمیمونه ونیول.
