د محصلانو چارو مرستیال د مرکزي لیلیې له بېلابېلو برخو څخه لیدنه وکړه.

د ننګرهار پوهنتون د محصلانو چارو مرستیال د دې پوهنتون د دعوت او ارشاد امریت او لیلیې عمومي مدیریت مسؤلینو په ملتیا د لیلیه محصلینو د استوګنځایونو، خوړنځي او نورو برخو څخه لیدنه وکړه او مسؤلین یې خپلو مکلفیتونو ته متوجه کړل.
د لیدنې پر مهال د محصلانو چارو مرستیال پوهنیار حافظ سید محمد قاسم هاشمي د محصلینو ستونزو اورېدلو سربېره هغوی ته وویل، چې د لیلیې نظم، پاکوالي او مقرراتو رعایت ته ژمن پاتې شي او خپلې اړتیاوې او ستونزې اړوندو مسؤلینو سره شریکې کړي.
نوموړي همداراز محصلین خپلمنځي یووالي او ورورګلوۍ ته وهڅول او سپارښتنه یې ورته  وکړه، چې د اسلامي شریعت ارشادات په خپل ژوند کې عملي، د خپل ظرفیت لوړونې لپاره دوامداره مطالعه ترسره او راتلونکو ازموینو ته چمتووالی ونیسي.
لیلیه محصلینو د پوهنتون له مرستیال څخه مننه وکړه، چې د دوی ستونزې یې واورېدې او د حل ډاډ یې ورکړ.