د لوړو زده کړو وزارت د دعوت او ارشاد رئیس د ننګرهار پوهنتون مسؤلینو سره غونډه وکړه.
د لوړو زده کړو وزارت د دعوت او ارشاد رئیس شیخ شاکرالله وحدت د ختیځ زون په امارتي پوهنتونونو کې د دعوت او ارشاد روانو چارو څخه د څارنې او ارزونې په لړ کې د ننګرهار پوهنتون رهبرۍ، پوهنځیو رئیسانو او دعوت او ارشاد امریت مسؤلینو سره غونډه وکړه او یاده برخه کې یې هغوی سره د لوړو زده کړو وزارت د مشرتابه لاښوونې او سپارښتنې شریکې کړې.
په همدې پار د ننګرهار پوهنتون ریاست مقام کې غونډه جوړه شوې وه، چې په کې د ننګرهار پوهنتون د رئیس او مرستیالانو سربېره د علمي شورا غړو، پوهنځیو رئیسانو او یو شمېر آمرینو برخه لرله.
د ننګرهار پوهنتون رئیس شیخ انعام الله مدني په خپله وینا کې د لوړو زده کړو وزارت د دعوت او ارشاد رئیس ته ښه راغلاست ووایه او پوهنتون کې د دعوتي امورو پرمختګ او اهمیت اړوند یې د خبرو کولو تر څنګ اړونده برخه کې د وزارت محترم مقام له پالیسۍ ملاتړ وکړ.
د لوړو زده کړو وزارت د دعوت او ارشاد رئیس ښاغلي شیخ شاکر الله وحدت د منکراتو په ازالې او معروفاتو اقامې کې د ننګرهار پوهنتون د مسؤلینو او استادانو هڅې وستایلې او زیاته یې کړه، چې د اسلامي نظام د فرامینو په رڼا کې چارې ترسره کول او د مسلکي پوهې تر څنګ پر ځان او نورو د شرعي احکامو تطبیق کې زیار ویستل د هر مومن استاد او اداري کارمند اساسي دنده ده.
ښاغلي وحدت پوهنتون کې د دیني احکامو بشپړ تطبیق او عامولو لپاره مسؤلينو ته د تمرکز زياتولو سپارښتنه وکړه.
نوموړي همدارنګه د نصاب اصلاح، اصولو سره سم د چارو ترسراوي، محصلینو فکري روزنې او څارنې، لیلیې مسجد ترمیم او بېلابېلو برخو کې د وزارت محترم مشرتابه سپارښتنې د پوهنتون له مسؤلینو سره شریکې کړې، چې د هغوی له خوا ورته د اجرااتو ډاډ ورکړل شو.
غونډه په دعایه کلام سره پای ته ورسېده.
