د لوړو زده کړو وزارت تضمین کیفیت او اعتبار ورکولو ریاست لخوا د اقتصاد پوهنځيو د ارزونې او اعتبار ورکولو په موخه د برنامه یي چارچوب جوړونې لس ورځنی ورکشاپ پای ته ورسېد.
د ورکشاپ پر مهال د متخصصینو له لوري د چمتو شوي چارچوب (جوړښت) له مخې به راتلونکي کې د ټولو امارتي او خصوصي پوهنتونونو او لوړو زده کړو موسساتو د اقتصاد پوهنځیو علمي، تدریسي، اداري او نور فعالیتونه ارزول کېږي او له هغې وروسته به د اعتبار سند ورکول کېږي.
یاد ورکشاپ د ننګرهار پوهنتون د مسلکي زده کړو پرمختیايي مرکز کې جوړ شوی و، چې د ننګرهار پوهنتون د مسؤلینو، تضمین کیفیت آمر او اقتصاد پوهنځي استادانو، سربېره په کې د خراسان، التقوی، تابش، الفلاح، روښان او اریانا خصوصي لوړو زده کړو مؤسسو د اقتصاد پوهنځيو رئیسانو، څانګو آمرینو او تضمین کیفیت مسؤلینو برخه لرله.
د لوړو زده کړو وزارت د تضمین کیفیت او اعتبار ورکولو رئيس استاذ شاکر وحیدي په وينا، لوړو زده کړو وزارت په پام کې لري، چې د ټولو برنامو لپاره برنامه یي ارزونه او اعتبار ورکونه رامنځته کړي او په همدې پار ننکرهار پوهنتون کې د اقتصاد پوهنځي اړوند برنامه يي چارچوب باندې عملاً کار ترسره کیږي.
د ننګرهار پوهنتون د علمي چارو مرستیال پوهندوی مولوي احسان الله ناصح خوښي څرګنده کړه، چې یاد ورکشاپ د بېلابېلو تحصیلي نهادونو د اقتصاد پوهنځیو رئیسانو او نورو مسؤلینو په حضور کې د تضمین کیفیت پروسې له مخې د چارو د ارزونې او اعتبار ورکولو د یو معیاري او واحد چارچوب د جوړېدو فرصت برابر کړ.
نوموړي تر کار لاندې چارچوب د اقتصاد پوهنځیو د ټولو چارو کیفیت ښه کولو، ارزونې او بیا کتنې برخه کې بنسټیز او ګټور ګام وباله.
د یادونې وړ ده، چې د لوړو زده کړو وزارت تضمین کیفیت او اعتبار ورکولو ریاست لخوا تر دې وړاندې هم دې ته ورته ورکشاپونه د طب او انجنیري پوهنځیو لپاره ترسره شوي او د استادانو او ګډونوالو په اتفاقي نظریاتو یې یادو پوهنځیو ته د چارو ارزونې او اعتبار ورکولو ځانګړي چارچوبونه جوړ کړي.
