د طب پوهنځي۹۶ تنو فارغېدونکو محصلینو د خپلو پایلیکونو دفاع وکړه او د ترسره کړیو څېړنو پایلې یې شریکې کړې.
د ننګرهار پوهنتون طب پوهنځي۵۶ مې دورې (۹۶) تنو محصلینو د خپلې تحصیلي دورې د پایلیکونو څخه دفاع وکړه او پر بېلابېلو موضوعاتو د ترسره کړیو څېړنو پایلې یې له اړوندو سکتوري ادارو سره د پوسټر او اورل پرېزنټېشنونو په شکل شریکې کړې.
په همدې پار د طب پوهنځي فرهنګي کمېټې له لوري غونډه جوړه شوې وه، چې په کې د ننګرهار پوهنتون رئیس، طب پوهنځي مسؤلینو، استادانو، د یو شمېر خصوصي پوهنتونونو او روغتیايي بنسټونو استازو او ګڼ شمېر محصلینو برخه لرله.
د ننګرهار پوهنتون رئیس شیخ انعام الله مدني غونډې ته د پرانیستې وینا پر مهال د طب پوهنځي د یادو محصلینو د څېړنیزو هڅو ستاینه وکړه او زیاته یې کړه، چې دا ډول څېړنې نه یوازې د محصلینو علمي پوهه لوړوي، بلکې روغتیايي سکتور ته هم ګټورې دي.
نوموړي وويل: علوم له تحقیق سرچینه اخلي او دا د پوهنتونونو دنده ده، چې د بېلابېلو موضوعاتو په اړه څېړنې وکړي او پایلې یې له اړوندو ادارو او بنسټونو سره شریکې کړي.
د طب پوهنځي رئیس پوهنوال ډاکتر محمد عظیم عظيمي د خپلې وینا پر مهال د څېړنو په ارزښت خبرې وکړې او د غونډې ګډونوالو ته یې د پوهنځي له لوري د څېړنو په برخه کې د وروستیو پرمختګونو او د یادو محصلینو د ترسره کړیو څېړنو په اړه معلومات وړاندې کړل.
د غونډې په دویمه برخه کې فارغېدونکو محصلینو د خپلو پایلیکونو څخه دفاع وکړه، د خپلو ترسره کړیو څېړنو پایلې یې له ګډونوالو سره شریکې کړې او د هغوی پوښتنې یې ځواب کړې.
