د سپین غر لوړو زده کړو موسسې مسؤلینو د ننګرهار پوهنتون له مشرتابه سره ولیدل.

ددې لیدنې موخه د یادې موسسې له لوري دایرېدونکي(ملي څېړنیز کنفرانس) په هکله د مشورو او همکارۍ غوښتنه وه. سپین غر لوړو زده کړو موسسه غواړي، چې د روان ۱۴۰۳ لمریز کال لیندۍ/ قوس میاشت کې ( په افغانستان کې روغتیايي سیستم او خدمتونو ته کتنه؛ ستونزې، فرصتونه او حل لارې) تر عنوان لاندې ملي څېړنیز کنفرانس دایر کړي. د سپین غر لوړو زده کړو موسسې رئیس ښاغلي شمس الدین همت په خپلو خبرو کې ننګرهار پوهنتون یو ملي تحصیلي بنسټ یاد کړ، په تېر کې یې له خپلې موسسې سره ددې پوهنتون د هر راز همکاریو یادونه او مننه وکړه. نوموړي د خپلې موسسې له لوري دایرېدونکي کنفرانس د ښه ترسراوي په برخه کې د ننګرهار پوهنتون د رهبرۍ او استادانو مشورې اړینې وبللې، د موضوع اړوند یې د هغوی د مقالو تر څنګ د طب پوهنځي د ۶ تنو استادانو غوښتنه وکړه، چې د کنفرانس مقالو په کتلو کې ورسره همکاري وکړي. د ننګرهار پوهنتون رئیس شــ/یخ انعام الله مدني، د علمي چارو مرستیال پوهندوی احسان الله ناصح او د محصلانو چارو مرستیال پوهنیار حافظ سید محمد قاسم هاشمي په خپلو خبرو کې ټولو دولتي او خصوصي پوهنتونو سره مرسته او همکاري ترسره کول خپل مسؤلیت وباله، د سپین غر لوړو زده کړو موسسې له لوري د یاد کنفرانس په دایرېدو یې خوښي وښوده او هغوی ته یې یاده برخه کې د هر راز همکارۍ او مشورو ورکولو ډاډ څرګند کړ. سرچینه: د عامه اړیکو، اطلاعاتو او نشراتو آمریت