ننګرهار پوهنتون کې د پایلو پر بنسټ او محصل محورۍ زده کړو (OBE-SCL) د تدریسي تګلارو د زده کړې ورکشاپ پیل شو.

nu_admin
دوشنبه ۱۴۰۰/۳/۱۷ - ۸:۵۴
image

 

یاد ورکشاپ، چې د ننګرهار پوهنتون د مسلکي زده کړو پرمختیايي مرکز (PDC) په نوښت جوړ او دوه اوونۍ به دوام وکړي، د سپین غر لوړو زده کړو موسسې ۲۲ تنه استادان په کې برخه لري.

د ورکشاپ د پرانیستې پر مهال د ننګرهار پوهنتون رئيس پوهاند دوکتور خلیل احمد بهسودوال وویل: ننګرهار پوهنتون د هېواد د دویم ستر پوهنیز او اکاډمیک مرکز په توګه خپله دنده او مسؤلیت ګڼي، چې د نویو او ځوانو پوهنتونونو او تحصیلي موسسو سره اکاډمیکه مرسته او همکاري وکړي.

نوموړي زیاته کړه: ننګرهار پوهنتون د سپین غر لوړو زده کړو موسسې سره د ګډو همکاریو د تفاهملیک په اساس ژمن دی، چې د نوموړي پوهنتون د استادانو د ظرفیت لوړونې په خاطر ورته په بېلابېلو برخو کې روزنیز کورسونه دایر کړي.

پوهاند بهسودوال د پایلو پر بنسټ او محصل محورۍ زده کړو په اړتیا او ارزښت خبرې وکړې او له ګډونوالو استادانو یې غوښتنه وکړه، چې په فعال ګډون سره د ورکشاپ له مطالبو ګټه پورته کړي او د اړوندو پوهنځیو له نورو استادانو سره يې هم شریک کړي.

د ننګرهار پوهنتون د علمي چارو مرستیال پوهندوی دوکتور محمد حامد کډوال او د مسلکي زده کړو پرمختیايي مرکز آمر پوهنیار محمد مالیار رحماني نور ویناوال وو، چې د ورکشاپ د محتوا په اړه یې ګډونوالو استادانو ته معلومات ورکړل.

د سپین غرو لوړو زده کړو موسسې رئیس ډاکتر سبحان الله حمیدي د ننګرهار پوهنتون د مشرتابه مننه وکړه، چې تل یې د دوی معنوي او اکاډمیک لاسنیوی کړی او په راتلونکې کې یې هم د ورته همکاریو پر دوام ټینګار وکړ.

د یادونې وړ ده، چې د ورکشاپ د روزنې چارې د دوو تنو مسلکي روزونکو پوهنمل دوکتور مسعود موحد او پوهنمل جاوید صاحبزاده له خوا پر مخ وړل کېږي.