ننګرهار پوهنتون کې یوه حلقه ژوره څاه له جوړېدو وروسته ګټې اخيستنې ته وسپارل شوه.
د پوهنتون د مسؤلينو په وينا، ياده څاه د النور په نوم خيريه بنسټ د نږدې سل زره افغانیو په مالي مرسته د ساینس پوهنځي لپاره جوړه شوې ده.
د يادې څاه د پرانيستې په مراسمو کې د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستيال پوهنیار قاضي خالد صداقت، د علمي چارو مرستیال پوهنمل احسان الله ناصح، د محصلانو چارو مرستيال پوهنوال سيد اکرم هاشمي او د ساینس او اقتصاد پوهنځیو رئیسانو او استادانو سربېره د النور خيريه بنسټ استازو برخه لرله.
د پرانيستې پر مهال د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستيال پوهنیار قاضي خالد صداقت د النور خيريه بنسټ د مشرتابه مننه وکړه، چې د ښوونې او روزنې پوهنځي له څاه ګانو را وروسته دا درېیمه ژوره څاه ده، چې د یاد بنسټ له لوري په ننګرهار پوهنتون کې جوړېږي.
پوهنیار صداقت یاده چاره جاریه صدقه وبلله او مرسته کوونکو ته یې د الله تعالی له درباره د اجر او بریاوو غوښتنه وکړه.
د یادونې وړ ده، چې د غونډې په وروستۍ برخه کې د پوهنتون او ساینس پوهنځي د رهبرۍ له لوري د النور خیریه بنسټ مشرتابه ته د تقدیر په موخه ستاینلیک هم ورکړل شو.
