د ننګرهار پوهنتون د نړیوال ژورنال علمي بورد غونډه وکړه.
په یاده کاري ناسته کې، چې د دې پوهنتون د رئیس شـ/ـیخ انعام الله مدني په مشرۍ ترسره شوه، د علمي چارو مرستیال پوهندوی احسان الله ناصح او د محصلانو چارو مرستیال پوهنیار حافظ سید محمدقاسم هاشمي په کې برخه لرله، د یاد ژورنال د کیفیت ښه والي، علمي او اداري چارو بهبود، د راتلونکې ګڼې د چاپ او پر لیکه کولو په اړه بحث او پرېکړې وشوې.
د ننګرهار پوهنتون رئیس شـ/ـیخ انعام الله مدني د مجلس د پرانیستې پر مهال وویل: د خوښۍ ځای دی، چې ننګرهار پوهنتون د شپږو ملي علمي ژورنالونو سربېره د بایو ساینس په برخه کې د یوه نړیوال ژورنال د خپرولو ویاړ لري، چې په کور دننه یې ددې پوهنتون تر څنګ د هېواد د نورو پوهنتونونو استادانو د علمي مقالو چاپ ته زمینه برابره کړې ده.
نوموړي د بورد غړو ته د نړیوالو معیارونو او د لوړو زده کړو وزارت د اصولو سره سم د ژورنال د کیفیت ښه والي سپارښتنه وکړه.
د علمي چارو مرستیال پوهندوی احسان الله ناصح په خپلو خبرو کې په خپل وخت د بورد د غونډو او د ژورنال د چاپ او پر لیکه کولو، د نورو هېوادونو د علمي کادرونو مقالو منلو او یو لړ نورو موضوعاتو په اړه لارښوونې وکړې، چې د بورد د غړو له خوا د اجرااتو ډاډ ورکړل شو.
د مجلس په وروستۍ برخه کې د بورد د غړو له خوا د تېرو فعالیتونو راپور د پوهنتون د مشرتابه سره شریک شو او همدارنګه د ژورنال د تمدید، کره کتونکو شمېر زیاتوالي، راغلو مقالو او نورو متفرقه مسایلو په اړه بحث او لازمې پرېکړې وشوې.
د عامه اړیکو، اطلاعاتو او نشراتو آمریت
