د ننګرهار پوهنتون د روان تحصیلي کال د نهايي سمستر ازموينې پيل شوې.
په یادو ازموینو کې، چې د غبرګولي په لومړۍ نېټه پیل او درې اوونۍ به دوام وکړي، ددې پوهنتون د لیسانس، ماسترۍ او شپې پوهنځیو نږدې دیارلس زره تنه محصلين ګډون لري.
د ننګرهار پوهنتون رئیس شـــــ/يخ انعام الله مدني، د علمي چارو مرستیال پوهندوی احسان الله ناصح او د محصلانو چارو مرستیال پوهنیار حافظ سید محمد قاسم هاشمي د بېلابېلو پوهنځيو د ازموینو له صحنو څخه لیدنه وکړه.
نوموړو د لیدنې پر مهال د پوهنځیو مسؤلینو او استادانو ته سپارښتنه وکړه، چې ازموینې دې د اصولو او مقرراتو سره سمې په پوره روڼتیا او شفافیت واخلي او پایلې دې په خپل وخت د محصلینو سره شريکې کړي.
د پوهنتون د مسؤلینو په وینا، د ازموینو د څار او نظارت په موخه يې د پوهنتون په کچه ۱۵ کسيزه کمېټه ټاکلې، چې د ازموینو پورې اړوندې چارې تنظيموي او ستونزو ته رسيده ګي کوي.
سرچینه: د عامه اړیکو، اطلاعاتو او نشراتو امریت
