د ننګرهار پوهنتون د روان سمستر نهايي ازموینې به راتلونکې سه شنبه د جوزا په لومړۍ نېټه پيل او د یادې میاشتې تر پایه به دوام وکړي.
د لوړو زده کړو وزارت د ازموینو کړنلارې او د ننګرهار پوهنتون د علمي شورا د پرېکړې له مخې به ددې پوهنتون د روان سمستر نهايي ازموینې د جوزا په لومړۍ نېټه پیل شي.
ازموینې د ټاکلي مهال وېش سره سم د سهار په ۸:۳۰ بجو پیلېږي او هره ازموینه به دوه ساعته وخت ولري.
یاده پرېکړه د ننګرهار پوهنتون د علمي شورا په هغه غونډه کې وشوه، چې نن د ثور په ۲۹ مه نېټه د دې پوهنتون د رئیس په مشرۍ ترسره شوه.
په نوموړې کاري ناسته کې، چې د پوهنتون مرستیالانو، د بېلابېلو پوهنځيو او تدريسي روغتون رئيسانو او استادانو په کې برخه لرله، د یادې پرېکړې سربېره په یو شمېر نورو علمي او تدریسي موضوعاتو بحث او خبرې وشوې.
د ننګرهار پوهنتون رئیس شــــــــ/یخ انعام الله مدني د مجلس د پرانیستې پر مهال د تېر سمستر د بریالي ترسراوي له کبله د پوهنځیو د رئیسانو او استادانو مننه وکړه او د راتلونکو ازموینو لپاره د اړین چمتووالي په اړه یې لازمې لارښوونې وکړې.
نوموړي د نړیوال کنفرانس ترسراوی، تضمین کیفیت پروسه کې په لوړو نمرو بریالیتوب او د علماء کرامو ازموینو اخیستنه د تېر سمستر پر مهال د پوهنتون لپاره سترې لاسته راوړنې وبللې او یاده برخه کې یې د پوهنځیو د رئیسانو، استادانو او ټولو منسوبینو هلې ځلې وستایلې.
د علمي چارو مرستیال پوهندوی احسان الله ناصح، د اداري او مالي چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي د مجلس نور ویناوال وو، چې مسؤلینو سره یې د علمي، تدریسي، ازموینو او تضمین کیفیت اړوند مسایل شریک کړل.
د مجلس په دویمه برخه کې د HEMIS سیستم څخه په اعظمي توګه ګټې اخیستې له کبله د انجنیري پوهنځي لومړی، ژورنالېزم او ارتباطاتو پوهنځي دویم او طب پوهنځي درېیم مقام واخیست، چې له امله یې د یادو پوهنځیو رئیسان د پوهنتون د مشرتابه او علمي شورا د غړو له خوا تقدیر شول.
د مجلس په وروستۍ برخه کې د ننګرهار، لغمان، کونړ سید جمال الدین افغاني او بامیان پوهنتونونو د استادانو د علمي ترفيعاتو ۷، تقرر ۵ او انفکاک ۲ کیسونو او ځینو نورو علمي موضوعاتو په اړه بحث او لازمې پرېکړې وشوې.
سرچینه: د عامه اړیکو، اطلاعاتو او نشراتو امریت
