د ژورنالېزم پوهنځي محصلینو ته د ویناوالۍ په برخه کې ۳ ورځنی ورکشاپ پای ته ورسېد.
یاد ورکشاپ، چې د ننګرهار پوهنتون ژورنالېزم پوهنځي د عامه اړیکو څانګې محصلینو ته دایر شوی و، د پای په مراسمو کې یې د ننګرهار پوهنتون رئیس، د علمي چارو او محصلانو چارو مرستیالانو، د ژورنالېزم پوهنځي رئیس او استادانو ګډون کړی و.
د ژورنالېزم پوهنځي د مسؤلینو په وینا، له یاد ورکشاپ څخه یې هدف د محصلینو ظرفیت لوړونه، جرئت زیاتوالی او له شته امکاناتو څخه د محصلینو په روزنه کې استفاده کول و.
د ورکشاپ پر مهال د ننګرهار پوهنتون رئیس شـــیـــ/ـــــخ انعام الله مدني په خپلو خبرو کې د علم، غوره ویناوالۍ او شخصيت جوړونې په ارزښت وغږېد او محصلینو ته یې سپارښتنه وکړه، چې د ورکشاپ پر مهال زده کړي مهارتونه او مسایل عملي او نورو ملګرو سره یې شریک کړي.
نوموړي دغه ډول ورکشاپونه د محصلینو په روزنه کې اړین وبلل او ټینګار یې وکړ، چې د ننګرهار پوهنتون په ټولو پوهنځیو کې باید محصلینو لپاره دغه ډول برنامې او ورکشاپونه جوړ شي، تر څو محصلین په خپل ځان بشپړ باور پیدا او غوره ویناوال جوړ شي.
د ژورنالېزم پوهنځي استاد او د عامه اړیکو څانګې آمر پوهنمل احمد جمیل پوپلزي په وینا، د ورکشاپ په لومړۍ ورځ ګډونوالو ته د غوره ویناوالۍ روزنه ورکړل شوه، په دویمه ورځ د ۴۲ تنو محصلینو تر منځ رقابتي سیالي جوړه شوه او په درېیمه ورځ له سیالۍ منتخب شویو محصلینو ته د وینا کولو موقع ورکړل شوه.
د ورکشاپ په ۳ مه ورځ لسو محصلینو د هېواد په پرمختګ کې د محصلینو ونډه، د محصل ژوند او پر وړاندې یې خنډونه، د اسلام له نظره د علم او تحصیل ارزښت، په چاپېریال ساتنه، ټولنې او کورنۍ په اصلاح کې د محصلینو ونډه موضوعاتو په اړه خپل جوړ کړي پرېزنټېشنونه ارایه او ویناوالي وکړه، چې د استادانو له لوري ورته د هغوی پیاوړي او کمزوري نقاط په نښه او د سمون لارښوونه وشوه.
ورکشاپ د ننګرهار پوهنتون د رهبرۍ غړو او ژورنالېزم پوهنځي استادانو له لوري لسو غوره محصلینو ته د ایوارډونو او تصدیق پاڼو په ورکړې سره پای ته ورسېد.
سرچینه : د عامه اړیکو، اطلاعاتو او نشراتو امریت
