د حقوقو او سیاسي علومو پوهنځي د شپې برنامې نوی آمر د یاد پوهنځي استادانو او منسوبینو ته وروپېژندل شو

nu_admin
چهارشنبه ۱۳۹۹/۷/۲۳ - ۸:۵۷
image

 

د حقوقو او سیاسي علومو پوهنځي استاد پوهنمل بلال بدلون د ننګرهار پوهنتون د رئیس پوهاند دوکتور خلیل احمد بهسودوال له خوا د یاد پوهنځي د شپې برنامې د نوي آمر په توګه د نوموړي پوهنځي استادانو او منسوبینو ته وروپېژندل شو.

په یاده پېژندغونډه کې د ننګرهار پوهنتون د مشرتابه سربېره د محصلانو چارو مرستیال پوهندوی سید اکرم هاشمي، د اداري او مالي چارو مرستیال حمیدالله احمدزي، د حقوقو او سیاسي علومو پوهنځي رئیس پوهندوی رفیع الله عطاء او د یاد پوهنځي یو شمېر استادانو او اداري کارکوونکو حضور درلود.

د ننګرهار پوهنتون رئیس پوهاند دوکتور خلیل احمد بهسودوال پوهنمل بلال بدلون وړ علمي کادر یاد کړ، چې په وینا یې، د تدریس تر څنګ په اداري برخه کې هم کافي پوهه او تجربه لري، چې په ټاکل کېدو سره به یې د شپې برنامې چارې لا زیاتې ښې او منظمې شي.

پوهاند بهسودوال د مخکېني آمر پوهنیار عدالت مومند د هلو ځلو ستاینه وکړه او نوموړي ته یې د لوی خدای (جله جلاله) له درباره د اجر غوښتنه وکړه.