د ننګرهار او کونړ سید جمال الدین افغاني پوهنتونونو تر منځ د ګډو همکاریو تفاهملیک لاسلیک شو.
د مسؤلينو په وينا، د یاد تفاهملیک له مخې به دواړه پوهنتونونه په تحقیقاتي، علمي، استادانو ـ محصلینو ظرفیت لوړونې، چارو کیفیت ښه والي، علمي سرچینو او تسهیلاتو قانوني استفادې او فرهنګي برخو کې د راتلونکو درېو کلونو لپاره یو له بل سره همکاري کوي.
یاد تفاهملیک د ننګرهار پوهنتون د رئیس او کونړ سید جمال الدین افغاني پوهنتون د علمي چارو مرستیال تر منځ د ننګرهار پوهنتون په ریاست مقام کې لاسلیک شو.
د غونډې پر مهال د ننګرهار پوهنتون رئیس شیخ انعام الله مدني د پوهنتونونو تر منځ د ګډو همکاریو په ارزښت وینا وکړه او ویې ویل، ننګرهار پوهنتون به د خپلو امکاناتو په چوکاټ کې د کونړ سید جمال الدین افغاني پوهنتون سره ښه علمي، تحقیقاتي او مسلکي همکاري ولري.
د کونړ سیدجمال الدین افغاني پوهنتون د علمي چارو مرستیال قاضي عبدالهادي فضلي په تېر کې د خپل پوهنتون سره د ننګرهار پوهنتون د همکاریو یادونه وکړه او زیاته یې کړه، چې پوهنتون به یې د هوکړه لیک له مخې ټولو ټاکل شویو برخو کې ننګرهار پوهنتون سره دوامدارې او صادقانه همکارۍ ته ژمن وي.
د یادې تفاهمنامې لاسلیک پر مهال د ننګرهار پوهنتون د څېړنو او علمي مجلو مرستیال پوهندوی دوکتور سعید محمد وقار، د محصلانو چارو مرستیال مولوي عبیدالله عابد، د څېړنو آمر پوهنمل دوکتور حکیم خان حقیار او د کونړ پوهنتون یو شمېر نورو مسؤلینو حضور درلود.
سرچینه: د اطلاعاتو، نشراتو او عامه اړیکو امریت
