د ننګرهار پوهنتون د خزاني سمستر منځنۍ ازموينې پيل شوې.
د ننګرهار پوهنتون اړوندو پوهنځيو کې د روان خزاني سمستر منځنۍ (۲۰ فیصده) ازموينې نن د عقرب میاشتې په ۱۰ مه نېټه پيل شوې، چې دوه اوونۍ به دوام وکړي.
د ننګرهار پوهنتون رئیس شیخ انعام الله مدني ازموینو بهیر څخه د لیدنې پر مهال مسؤلینو او استادانو ته سپارښتنه وکړه، چې ازموینې دې د ټاکلو اصولو سره سمې واخلي او پایلې یې په خپل وخت له محصلینو سره شریکې کړي.
د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد مسؤل او د ننګرهار پوهنتون د محصلانو چارو مرستيال شیخ شاکرالله وحدت وویل، چې د ازموینو د شفافې اخیستنې په موخه یې د پوهنتون ازموینو مرکزي کمېټې سره په ګډه په اتو مادو کې یو داخلي طرزالعمل جوړ کړی، چې له مخې به یې په منظمه او شفافه توګه ازموینې واخیستل شي.
شیخ صاحب وحدت د ازموینو مرکزي کمېټې غړو سره د مجلس پر مهال هغوی ته لارښوونه وکړه چې د روانو ازموینو بهیر څخه دې په کلکه څارنه وکړي، چې د هغوی له خوا ورته د لازمو اجرااتو ډاډ ورکړل شو.
