کمپیوټر ساینس پوهنځي کې (په مالي راکړه ورکړه کې د مصنوعي ځیرکتیا رول) تر سرلیک لاندې ورکشاپ دایر شو.
د ننګرهار پوهنتون کمپیوټر ساینس پوهنځي د سافټویر انجنیري څانګې استاد پوهنمل دوکتور محمد داود حیدرزي، چې په سلواکیا هېواد کې یې تازه خپله دوکتورا بشپړه کړې د خپلو نړیوالو څېړونکو همکارانو او ټیم غړو په مرسته د دې پوهنځي علمي کادر غړو او اداري کارکوونکو ته (په مالي راکړه ورکړه کې د مصنوعي ځیرکتیا رول) تر سرلیک لاندې یو ورځنی ورکشاپ وړاندې کړ.
یاد ورکشاپ چې په حضوري او انلاین بڼه ترسره شو، د مصنوعي ځیرکتیا پر بنسټ د مالي راکړې ورکړې د یوه نړیوال ماډل د معرفي کولو، د هغه د کاري میکانیزم، تخنیکي جوړښت او عملي ګټو په اړه تنظیم شوی و.
ورکشاپ دوه برخې لرلې چې په لومړۍ برخه کې د پروګرام موخې، مخینه، د سیسټم پېژندنه، د کارونې طریقې، د ګډون شرایط، عامه پوهاوی او نور اړوند موضوعات د بهرنیو استادانو له خوا په انلاین بڼه تشریح شول.
په دویمه تخنیکي برخه کې استاد حیدرزي د مصنوعي ځیرکتیا پر بنسټ جوړ کړي بېلابېل ماډلونه معرفي او تشریح کړل او دغه راز یې د یادو ماډلونو د کاري بهیر،کارېدلو الګوریتمونو، ریاضيکي او احصایوي فورمولونو او د سیستم تخنیکي جوړښت په اړه ګډونوالو ته هر اړخیز معلومات وړاندې کړل.
د ورکشاپ په پای کې د کمپیوټر ساینس پوهنځي رئیس پوهنوال علي جان عادل د مصنوعي ځیرکتیا په برخه کې د نوې ټکنالوژۍ د کارونې، علمي څېړنو او د مالي سیستمونو د پرمختګ په تړاو وړاندې شوي معلومات ګټور وبلل، له وړاندې کوونکو استادانو څخه د مننې ترڅنګ یې د ورته علمي او مسلکي برنامو د دوام غوښتنه وکړه.
سرچینه: د نشراتو او عامه اړیکو امریت
