د ننګرهار پوهنتون او د افغانستان د دکتورانو ټولنې تر منځ د ګډو همکاریو هوکړه لیک لاسليک شو.
د مسؤلينو په وينا، د ياد هوکړه لیک له مخې به دواړه لوري د څېړنو، علمي کنفرانسونو، د علمي کادرونو ظرفیت لوړونې، فوق لیسانس برنامو پیاوړتیا، مسلکي او تخنیکي مشورو ورکولو او نورو بېلابېلو برخو کې له یو بل سره همکاري کوي.
یاد هوکړه لیک د ننګرهار پوهنتون د علمي چارو مرستیال پوهندوی دوکتور محمد حامد کډوال او د افغانستان د دکتورانو ټولنې (ادا) د رئیس پوهنوال دوکتور عبدالمتین شهیدي تر منځ په داسې حال کې لاسلیک شو، چې د ننګرهار پوهنتون د محصلانو چارو مرستیال پوهنوال سید اکرم هاشمي، د شرعیاتو پوهنځي رئیس پوهاند دوکتور اسرارالحی منیب او د پوهنتون د بهرنیو اړیکو کمېټې مسؤل پوهنمل دوکتور محمد دوست صافي هم حضور درلود.
د ننګرهار پوهنتون د علمي چارو مرستیال پوهندوی دوکتور محمد حامد کډوال د افغانستان د دکتورانو ټولنې سره د هوکړه لیک په رامنځته کېدو خوښي وښوده او دا یې د پوهنتون د علمي پرمختګ او د فوق لیسانس برنامو د پیاوړتیا لپاره مهم ګام او لاسته راوړنه وبلله.
د افغانستان د دکتورانو ټولنې (ادا) رئیس پوهنوال دوکتور عبدالمتین شهیدي د خپلو خبرو پر مهال ننګرهار پوهنتون ستر علمي او اکاډمیک مرکز یاد کړ او د دواړه ادارو تر منځ یې د علمي اړیکو په پراختیا او پیاوړتیا ټینګار وکړ.
