د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.
په نوموړي کاري ناسته کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د بېلابېلو پوهنځيو او تدریسي روغتون رئيسانو او استادانو په کې برخه لرله، د پوهنتون د علمي، اداري، ترفیعاتو او يو شمېر نورو مسايلو په اړه بحث او پرېکړې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال د پوهنتون د درسونو د پیل په اړه مسؤلینو اړینې سپارښتنې وکړې.
نوموړي وویل: د لوړو زده کړو وزارت د رهبري شورا د پرېکړې سره سم ټاکل شوې، چې د پوهنتون درسونه د لوی اختر له رخصتیو وروسته روغتیايي سپارښتنو ته په پام په حضوري توګه پيل شي، چې د پوهنځیو او د پوهنتون د اړوندو نورو څانګو محترم مسؤلین باید اړین چمتوالی ونیسي.
د پوهنتون رئیس دغه راز د مجلس له غړو غوښتنه وکړه، چې د خپلو ادارو او دیپارتمنتونو علمي او تدریسي چارې په راتلونکې کې هم د تضمین کیفیت له معیارونو سره سمې پر مخ ویسي او زیاته یې کړه، چې د پوهنتون رهبري به وخت په وخت د هغې څارنه وکړي.
د علمي چارو مرستیال پوهندوی دوکتور محمد حامد کډوال او د محصلانو چارو مرستیال پوهنوال سید اکرم هاشمي د تضمین کیفیت د دوامدارې پروسې تطبیق، د پوهنځیو له خوا د ستراتېژیکو پلانونو د جوړولو او د لوړو زده کړو وزارت د معلوماتي سیستم (HEMIS) د عملي کولو په اړه ګډونوالو ته لازمې لارښوونې وکړې.
د پوهنتون مشرتابه د فساد پر وړاندې د مبارزې کمېټې درې تنه غړي پوهاند دوکتور عبدالحی مقیم، پوهنوال محفوظ الله عارفي او پوهنیار شمس الرحمن پیاوړی، چې د پوهنتون مالي او حسابي او نورو څانګو د چارو څارنه او ارزونه یې کړې وه، د ښو کړنو له امله د علمي شورا په غونډه کې د ستاینلیکونو په ورکړې سره تقدیر کړل.
د مجلس په وروستۍ برخه کې د ننګرهار پوهنتون سربېره د کونړ سید جمال الدین افغاني او لغمان پوهنتونونو د علمي ترفیعاتو ۱۲ او د رتبې تثبیت ۲ کیسونو او د يو شمېر نورو متفرقه مسايلو په اړه بحث او پرېکړې وشوې. د پوهنتون د حضوري درسونو د وخت په اړه پرېکړه وشوه، چې د ورځې درسونه به د سهار په ۷ بجو او د شپې پوهنځیو، ماسترۍ او دوکتورا درسونه به د ماسپښین په ۳:۳۰ بجو پیلېږي.