د ننګرهار پوهنتون د فارغو محصلانو ټولنې (Alumni Association) د پرانیستې په اړه مشورتي ناسته ترسره شوه.
په یاده مشورتي ناسته کې د ننګرهار پوهنتون رئیس پوهاند دوکتور خلیل احمد بهسودوال، د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د یادې ټولنې مشر انجنیر خان محمد دوست او اجرائیه غړو برخه لرله.
په پیل د یادې ټولنې مشر انجنیر خان محمد دوست د پوهنتون مشرتابه او د مجلس غړو ته د ټولنې د تېرو کړنو ګزارش وړاندې کړ.
نوموړي وویل: د ټولنې ابتدايي تشکیلات جوړ شوي، د عدلیې له وزارت نه یې د رسمیت جواز ترلاسه شوی، بانکي حساب، مهر او لوګو، دفتر او ځینې نور اړین کارونه یې ترسره شوي او پاتې چارې به یې په رسمي توګه له پرانیستې وروسته د ملګرو په مرسته ترسره کوو.
د ننګرهار پوهنتون رئیس پوهاند دوکتور خلیل احمد بهسودوال د پوهنتون د فارغانو ټولنې ایجاد یو بې ساری نوښت او مهم ګام وباله او زیاته یې کړه، چې د پوهنتون د یوه فارغ او مسؤل شخص په توګه په ټولو مثبتو فعالیتونو کې ستاسې ملاتړی او همکار یم.
د مجلس په دویمه برخه کې د ټولنې د پرانیستې مراسمو په اړه، چې په نږدې راتلونکې کې به د یوې سترې غونډې په ترڅ کې ترسره شي، مشورې او نظریات شریک او د غړو تر منځ مسؤلیتونه ووېشل شول.
